Jıynǵa aýdan ákimi Ǵalym Ismaılov, oblystyq Aýyl sharýashylyǵy basqarmasynyń basshysy Serik Turbekov, Shardara, Ordabasy aýdandary men Túrkistan qalasy ákimderiniń salalyq orynbasarlary jáne aýyl sharýashylyǵy bólimderiniń basshylary, sondaı-aq Almaty men Jambyl oblystarynan kelgen ǵalymdar, jergilikti sharýalar qatysyp, tyń tájirıbeler men jańalyqtardyń kýási boldy.
Eń aldymen semınar trenıngke qatysýshylar Dostyq aýyldyq okrýgindegi K-19-7 kanalynyń boıynda «Qazaq sý sharýashylyǵy» ǵylymı zertteý ınstıtýty oılap tapqan sý ólsheýish quraldy praktıkalyq synaqtan ótkizdi. Instıtýt mamandary qurastyrǵan sý deńgeıiniń datchıgi ýltradybysty ólshegish arqyly sý deńgeıiniń ózgerisi týraly aqparattardy qashyqtan alýǵa múmkindik beredi. Aqparat jeke pochtańyzǵa nemese SMS túrinde mobıldi telefonyńyzǵa kelip túsedi. Kompıýter men smartfon damyǵan búgingi tańda maqtaraldyq dıqandarǵa bul qurylǵymen jumys jasaý qıyndyq týdyrmaıdy. Jalpy, DÝV 0,005-10 datchıgin sýarmaly júıelerdiń gıdrobeketterine engizý – sý deńgeıi men shyǵynyn anyqtaý dáldigin joǵarylatady jáne aqparatty jyldam alýǵa kómektesedi.
Maqtaral aýdanynyń sýarmaly jerlerine jer asty jáne qashyrtqy káriz sýlaryn fosfogıps engizý arqyly paıdalaný tehnologııasyn ǵalymdar birneshe aıdan beri «Ketebaı» kooperatıvinde synaqtan ótkizip kelgen. Synaqtan ótip jatqan tehnologııanyń basty maqsaty - sýarmaly jerlerdiń qunarlyǵyn saqtaı otyryp mol ónimge qol jetkizý. «Fosfogıpsti bir ret engizgen jaǵdaıda keminde 3-4 jyl boıy jer qunarlyǵyn joǵaltpaıdy», - deıdi «Qazaq sý sharýashylyǵy» ǵylymı zertteý ınstıtýtynyń ǵalymdary.
Semınar trenınge qatysýshylardyń kelesi aıaldaǵan jeri – J.Eralıev aýyldyq okrýgindegi «Nuraly jol» sharýa qojalyǵy. Erbol Eralıevtiń basshylyǵyndaǵy qojalyq 7 jyl buryn aýdanda eń birinshi bolyp «tereń qopsytý» tehnologııasyn qoldanǵan bolatyn. Nátıjesinde qojalyq maqtasynyń ónimdiligi 40 sentnerge deıin artty. Bul tehnologııanyń bir paıdasy – maqta alqaby qysqy sýarý kezeńinde kóbirek sý qajet etkenimen, jazǵy sýarý kezinde sýdy kóp qajet etpeıdi jáne ol maqtaraldyqtar úshin óte tıimdi. Osylaısha Maqtaralda maqta óndirýden aldyna jan salmaıtyn sharýashylyqtyń tájirıbesin semınar-trenıngke qatysýshylar kórip, úırenip qaıtty.