Aqtoǵaı aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń bas mamany Samat Sekenovtiń aıtýynsha, Qaraoba aýylynyń aıaldamasyndaǵy jaryqtandyrý qurylǵysy jergilikti «Rozen» JShS-niń demeýshilik qarajatymen ornatylsa, Qojamjardaǵy aıaldamany jaryqtandyrý úshin aýyl ákimdiginiń esepshotynan aqsha bólingen. - Bir aıaldamaǵa jaryqtandyrý shamyn ornatý shamamen 200 myń teńge turady. Tańnan keshke deıin kún sáýlesi arqyly qýat jınap turady da, keshke qarańǵy túse bastaǵanda avtomatty túrde jaryǵy qosylady, - deıdi Samat Sekenov.
«Ertisten jáne Aqtoǵaıdan shyqqan avtobýstar bul eki aýylǵa da kirmeıdi. Aýdan ortalyǵyna nemese oblys ortalyǵyna baratyn turǵyndar avtobýsty aýyl syrtynda kútedi. Sondyqtan, bul aýyl turǵyndaryna avtobýs kútý kezinde qolaıly bolsyn degen maqsatpen aýyl ákimderiniń bastamasy boıynsha júzege asyrylyp otyr. Ásirese, kún kesh shyǵyp, erte batatyn qys mezgilinde paıdasy zor. Bas mamannyń sózinshe, keleshekte osyndaı ıgi iske demeýshilik jasaıtyn kásipkerler tabylyp jatsa, aýdanǵa qarasty basqa aýyldardyń aıaldamalaryn da osylaı jaryqtandyrýdy kózdep otyr.