Búginginiń ózekti máselesin arqaý etken sharanyń ótýine qalalyq bilim basqarmasy men Qazaqstandyq mektepke deıingi uıymdar qaýymdastyǵy muryndyq boldy.
Shara barysynda mektepke deıingi mekemeni ashýǵa nıet bildirgen kásipkerlerge ony ashýdyń tártibi, mektepke deıingi mekemeni ashýǵa baılanysty zańnamamen belgilengen talaptar jáne onyń ashylǵannan keıingi jumys barysy, sondaı-aq, mektepke deıingi tárbıe men oqytý boıynsha memlekettik bilim berý tapsyrysyn ornalastyrý týraly qajetti aqparattar usynyldy.
«Búgingi tańda elordada 30 myńnan astam balǵyn balabaqshaǵa kezekte tur. Memleket tarapynan osy balalardyń barlyǵyn orynmen qamtamasyz etý úshin qarajat jaǵynan úlken qadamdar jasaý kerek. Sondyqtan osy máseleni biz jekemenshik sektormen, ıaǵnı kásipkerlermen birlese otyryp, aldaǵy 3 jylda tolyǵymen sheshýdi kózdep otyrmyz. Bul naqty jospar. Jyl saıyn biz 10 myń memlekettik jáne jekemenshik balabaqsha ornyn ashyp otyrsaq, 3 jylda balalar tolyǵymen qamtylyp, bul problema sheshimin tabady» dedi qalalyq bilim basqarmasynyń basshysy Ánýar Janǵozın.
Búginde Astana boıynsha mektepke deıingi 263 mekeme jumys isteıdi, onyń ishinde 96 memlekettik, 2 vedomstvolyq jáne 116 jeke, 49 shaǵyn ortalyqtar bar. Qazir astanalyq 46 062 balabaqshaǵa barady. Olardyń 27 193-i memlekettik, 14 854-i jekemenshik balabaqshalardyń tárbıelenýshileri. Shamamen 6 myń búldirshin shaǵyn ortalyqqa jáne mektepke deıingi mekemelerge barady. Kezekte turǵan 33 myńnan astam bala bar. Kúndelikti baqsha kezegine shamamen 90 bala turady.
Basqarma basshylyǵynyń aıtýynsha, byltyr jekemenshik sektormen birlese otyryp, 4 myńǵa jýyq oryndy qamtıtyn 44 balabaqsha ashylǵan. Bıylǵy aqpan aıynda ashyq esik kúnin ótkizip, onyń nátıjesinde astanalyq kásipkerler tarapynan 5,5 myń oryndy qamtıtyn memlekettik tapsyrysqa suranys kelgen. Búgingi ashyq esik kúninen keıin olardyń da sany artady dep kútýde.