Dúbirli dodaǵa elimizdiń túpkir-túpkirinen esimderi jurtqa etene tanys Muhıt Tursynov, Rýslan Ábdirazaqov, Saıat Shámshıev, Aıbat Seıten bastaǵan, Bekzat Ahmetbekov, Nurdáýlet Jarylǵapov syndy balýandar qostaǵan 24 kúres sheberi qatysyp, jarystyń kórigin qyzdyrdy.
«Tarıhy tereńnen tamyr tartqan, qoınaýy qaraǵaıǵa, alqaby astyqqa toly kıeli Besqaraǵaı óńirine qosh keldińizder. Bul dúbirli dodanyń áıgili aıtysker aqyn Nurlybek Baımuratov, kórnekti sazger Tólegen Muhamedjanov, belgili akter Meńtaı О́tepbergenovteı tulǵaly azamattardy dúnıege ákelgen Besqaraǵaı topyraǵynda ótkizilýi beker emes. Esengeldi Izatov, Toǵaıbek Kırıbaev, Qumar Muqashev syndy esimderi elge málim balýandar shyqqan óńirde mundaı baıraqty básekeniń uıymdastyrylýy zańdy dep bilemiz. Elimizdiń eń bilekti de júrekti balýandarynyń basyn qosqan saıystyń Besqaraǵaı jerinde jalaýy jelbireýi – aýdan úshin zor abyroı, bıik mártebe» dedi chempıonattyń ashylý saltanatynda sóz alǵan Besqaraǵaı aýdany ákiminiń mindetin atqarýshy Erbolat Rahmetýllın.
Halyqaralyq EKSPO kórmesi jáne Elbasynyń «Rýhanı jańǵyrý: bolashaqqa baǵdar» maqalasynda kórsetilgen mindetterdi júzege asyrý aıasynda,bir jaǵy el chempıonaty, ekinshi jaǵynan halyqaralyq «Álem Barysy» týrnırine qatysatyn balýandardy irikteý maqsatynda uıymdastyrylǵan jarys óte tartysty ótti. Bul saıysta Shyǵys Qazaqstannan 6 birdeı balýan synǵa túsip, bir balýan ǵana aqtyq synǵa alqynbaı jetti. Muhıt Tursynov jartylaı fınalda ejelgi qarsylasy Rýslan Ábdirazaqovtan aılasyn asyryp, fınalda astanalyq Aıbat Seıtendi alyp uryp, túıe balýandar arasyndaǵy básekeniń birinshi oryn júldesin ıelendi. Ekinshi oryn Aıbat Seıtenge buıyrsa, eki úshinshi oryndy - Rýslan Ábdirazaqov pen mańǵystaýlyq Nurdáýlet Jarylǵapov ózara bólisti.
Azamat QASYM,
«Egemen Qazaqstan»
Shyǵys Qazaqstan oblysy
Sýretter avtordiki