Bir mysal aıtaıyq, Qyzyljardan Astanaǵa Kókshetaý arqyly ózimizdiń mashınamyzben keletinimiz bar. Qudaıǵa shúkir, byltyrdan beri Kókshetaýdy aınalyp, Astananyń úlken jolyna kópir arqyly aparatyn ádemi tas jol salyndy. Bul da bolsa el ekonomıkasynyń nyǵaıyp, etek-jeńimizdiń jınalyp kele jatqandyǵynyń bir kórinisi. Áıtpese mundaı eki qanatty dańǵyl jol Kókshetaýǵa buryn-sońdy salynǵan emes edi. Alaıda osy jolǵa shyǵarda bir áttegen-aı degizetin is bar. Álgi jolǵa: «Ombyǵa aparady» degen belgi qoıǵan da Astanany kórsetýdi artyq sanapty...
Ras, bul jol týrasynan Reseıdiń Omby qalasyna aparady, biraq biraz júrgen soń jol aıryǵy Astananyń dańǵyl jolyna shyǵarady. Belgige jazylmaǵan soń Qyzyljardan kele jatqan keıbir júrginshiler bul joldyń Astanaǵa shyǵaratynyn bilmeı de qalýy múmkin. Sondyqtan tike júrip, Kókshetaýdy kesip, Astanaǵa qalanyń buralań jolymen kóp aınalyp, áýre bolyp shyǵýy kádik. Demek kórsetkishtiń ornatylmaýy jolaýshyǵa yńǵaısyzdyq týǵyzady.
Bul bir deńiz. Ekinshiden... jáne eń bastysy sol jol belgisin ornatýǵa buıryq beretin jol basqarmasynyń sheneýnikterine aldymen Astanany aýyzǵa alý kerektigi, óz jolynyń oǵan aparatyndyǵyn maqtan tutý, ıaǵnı patrıottyq sezim jetispeı turǵan sııaqty. Áıtpese, Qazaq eliniń eń basty qalasyn aldymen aıshyqtap kórsetýge tıisti edi ǵoı?
Joǵaryda aıtqanymyzdaı, osydan kókshetaýlyq keıbir sheneýnikterdiń óz Otanyna degen salqyn kózqarasyn ańǵarǵandaı boldyq. Bul tipti usaq nárse emes. О́z Otanyna qyzmet etetin sheneýnikterdiń júreginde aldymen sol Otanyn órkendetý men gúldendirý ıdeıasy turý kerek qoı. Olar memleketten sol úshin de aqsha alady emes pe? Al Astana jaı qala emes, bizdiń táýelsiz elimizdiń sımvoly. Qazaqsha aıtqanda, qasıet tutatyn belgisi. Ony ardaqtaý, ataǵyn aspandatýǵa úles qosý – jeke quqyń ǵana emes, azamattyq ta, qyzmettik te mindetiń. «Omby-Omsk» bálen km» degen jol kórsetkishin jasatqan sheneýnik mundaıdy oılap turǵan joq, oǵan tek óz mindetin saldyr-salaq atqaryp, bir jol belgisin qoısa bolǵany. Qyzyljardan elordaǵa júrip bara jatqan jolaýshylar onyń Astanaǵa aparatynyn bilmeı qalsa, tipti meıli. Eń bastysy, Ombyny kórsetse boldy.
Týǵan elge degen osyǵan jaýapty qyzmetkerlerdiń beıjaı, tipti salqyn kózqarasy adamǵa túrli oı salady. Belginiń joqtyǵyn ári-beri ótip, jol tártibin baqylaıtyn, tártip buzǵandarǵa aıyppul salýdy kózdep, jıi júretin jol polısııasynyń qyzmetkerleri de kúnde kóredi ǵoı. О́z qoldarynan kelmese de solar joǵary basshylyqqa bildirip, jol kórsetkishin qoıatyndarǵa aıtýǵa tıisti edi. Biraq olarǵa da báribir, eshqaısysyna eshteńe kerek joq sııaqty.
Osy máseleni byltyr da jazǵan edik, biraq bári báz-baıaǵy qalpynda tur. Bári de sananyń, mádenıettiń óskendiginde ǵoı. Basshylar osyndaıǵa mán berip, qyzmetkerlerine sanaly, esti bolýdy eske salyp otyrsa ǵoı...
Jaqsybaı SAMRAT, «Egemen Qazaqstan»