Almatydaǵy Ál-Farabı dańǵylynda úsh adamnyń ómirin qıǵan jantúrshigerlik jol-kólik oqıǵasyn tergeý jumysy aıaqtalýǵa jaqyn. Bul týraly Ishki ister mınıstriniń orynbasary Sanjar Ádilov málimdedi, dep jazady Egemen.kz.
Vıse-mınıstrdiń aıtýynsha, qylmystyq is boıynsha tergeý jumystary sońǵy satyǵa jetken.
«Almatydaǵy jol-kólik oqıǵasyna qatysty is aıaqtalý satysynda tur. Aldaǵy kúnderi is materıaldary aldymen jábirlenýshi tarapqa tanysý úshin usynylady, odan keıin kúdikti men onyń qorǵaýshysyna beriledi», dedi Sanjar Ádilov.
Aıta keteıik, oqıǵa 21 naýryz kúni Ál-Farabı dańǵyly boıynda bolǵan. Jol-kólik oqıǵasy kezinde qarsy baǵytqa shyqqan Zeekr kóligi Mercedes avtokóligimen soqtyǵysqan. Apat saldarynan kóliktegi úsh adam oqıǵa ornynda qaza tapqan.
Qazir Zeekr júrgizýshisi tergeý ızolıatoryna qamalǵan. Buǵan deıin ol medısınalyq mekemede kúzetpen bolǵany habarlanǵan.
Zań boıynsha, bul is boıynsha kináli dep tanylǵan jaǵdaıda 8 jylǵa deıin bas bostandyǵynan aıyrý jazasy qarastyrylýy múmkin.
Aıta keteıik, Ishki ister mınıstri Erjan Sádenov Ál-Farabı dańǵylynda bolǵan jol apatyna baılanysty jasaǵan málimdemesinde birneshe polısııa basshysynyń qyzmetinen bosatylǵanyn málimdegen bolatyn.