Elbasy N.Nazarbaevtyń el gazeti «Egemenniń» sáýir aıyndaǵy sanynda jaryq kórgen «Bolashaqqa baǵdar: rýhanı jańǵyrý» atty maqalasynda erlerdiń esimin el jadynda saqtaýǵa yqpalyn tıgizetin bir másele aıtylǵan-dy. Memleket basshysy: «Ult maqtanyshy bizdiń burynǵy ótken batyr babalarymyz, danagóı bılerimiz ben jyraýlarymyz ǵana bolmaýǵa tıis. Men búgingi zamandastarymyzdyń jetistikteriniń tarıhyna da nazar aýdarýdy usynamyn. Bul ıdeıany «Qazaqstandaǵy 100 jańa esim» jobasy arqyly iske asyrǵan jón. «Qazaqstandaǵy 100 jańa esim» jobasy – Táýelsizdik jyldarynda tabysqa jetken, elimizdiń ár óńirinde turatyn túrli jastaǵy, san alýan etnos ókilderiniń tarıhy», degen bolatyn.
Prezıdent pármen bergennen soń kóp uzamaı Aqparat jáne kommýnıkasııalar mınıstrligi Qazaqstan halqy Assambleıasymen birlesip «Qazaqstannyń 100 jańa esimi» atty jobany qolǵa aldy. Bul jobany basqalarynan ereksheleıtin tustary jetip-artylady. Ony irikteý talaptaryna qarap-aq aıqyn ańǵararyńyz haq. Máselen, túzilgen tizimge enetinderdiń jas mólsherine, ultyna, týyp-ósken óńirine, qyzmet salasyna shekteý qoıylmaıdy. Sol sııaqty, sońǵy shırek ǵasyr ishinde juldyzy jarq etip janǵan jandar ǵana nazarǵa alynady. Er esimin anyqtaýǵa eldiń ózi tikeleı qatysady, ıaǵnı úmitker azamattardy halyq «El.kz» portalyndaǵy «100 esim.el.kz» arnaıy jobasyna ózi usynady. Usynylǵan jandardyń arasynan «júzden júırik, myńnan tulpar» atanýǵa laıyqtaryn tańdaýǵa tanymal qoǵam qaıratkerlerinen, ǵalymdar men shyǵarmashylyq ókilderinen, memlekettik hám bıznes qurylymdardaǵy belgili adamdardan jasaqtalǵan jumys toby da qatysýda.
Osy joldardy jazyp otyryp, jobany júzege asyrýmen tikeleı shuǵyldanyp jatqan «El.kz» portalyndaǵy áriptesterimizge habarlasqan edik. Olar osy ıgilikti iske jumylǵan jurttyń qarasy qalyń ekenin aıtty. Qazirdiń ózinde portalda bes júzge tarta ómirbaıan jarııalanypty. Kún saıyn jańadan jarııalanyp jatqandarynyń ózi júzdep sanalady eken. О́mirbaıandardyń arasynda áleýmettik salada eńbegi elengen tulǵalardyń esimi jıi kezdesedi. Sport, mádenıet salasynda juldyzy jarqyraı kóringen jandar da jetkilikti. Úmitkerlerdiń qaı óńirden, qandaı salada nendeı jetistikke jetkeni týraly derekter berilgen. Basqa saıttarda jarııalanǵan, keıipkerlerdiń tabıǵatyn ashyp, tulǵasyn tanı túsýge kómektesetin dúnıelerdiń siltemesi de toptastyrylypty.
Osy oraıda, «Qazaqstannyń 100 jańa esimi» degen mártebeli atqa laıyq degen tulǵalardyń qatarynan oryn alýǵa ábden laıyq degen azamattardyń esimin kókeıimizde jańǵyrtyp kórgen edik. Aldymen alty qurlyqqa eldiń abyroıyn shyǵarǵan Ermahan Ybyraıym, Serik Sápıev, Gennadıı Golovkın, Olga Rypakova, Denıs Ten, Qanat Islam syndy sańlaq sportshylar til ushyna oraldy. Jetimderdiń jebeýshisi, emine shıpa izdep talaı adamnyń alǵysyn arqalaǵan Arýjan Saın syndy arýdy da aınalyp óte almasymyz anyq. Tarazdaǵy terrorlyq oqıǵa kezinde erliktiń eren úlgisin kórsetip, janyn qıǵan «Halyq qaharmany» Ǵazız Baıtasovtyń esimi de «100 esimniń» qatarynda qashalýǵa ábden laıyq degen senimdemiz.
Sol sııaqty, belgili jýrnalıst, telejúrgizýshi, «Uly qazaqtardyń taǵdyry men qupııasy» týraly derekti fılmder toptamasynyń júrgizýshisi Maıa Bekbaevanyń eńbegine, kásibı bilim-biligine eshkim daý aıta almas. Belgili kásipker, talaı sportshynyń tynysyn ashqan mesenat Baýyrjan Ospanov syndy Atymtaı jomarttardyń da jóni bólek. Álemniń teatrlarynda óner kórsetip, talǵampaz tyńdarmandaryn tánti etken, ónerimen uıytqan Marat Beısenǵalıev, Alan Bóribaev, Marııa Mýdrıak syndy juldyzdarymyz jáne bar. Jalpaq álemdi talantymen jaýlaǵan, erekshe daýysymen baýraǵan Dımash Qudaıbergenovti bul tizimge laıyq emes dep kim aıta alar?!
Aıta bersek, «100 jańa esimge» suranyp, á degennen kókeıge tireletin jandar az emes eken. Tizim shekteýli ekenin túsinemiz, árıne. Bizdiki – has talanttar tasada qalmasa degen tilek. Jarqyraı kórinip júrgender ǵana emes, «El degende eminip, jurt degende júginip qyzmet» qylǵan, sol qyzmetiniń qaıtarymyn kútpeıtin qanshama qarapaıym jandar bar. Búgingideı ýaqyt kóz ben oıdy ilestirmes qarqynmen zaýlaǵan kezeńde elimizdiń «eń, eń..» degen jaqsy men jaısańy «100 jańa esim» jobasynyń arqasynda jurt jadynda jattalyp qalsa ıgi.