Qaraǵandy oblysynyń ákimi Erlan Qoshanov 9 tamyzda Qarajal qalasy jáne Jáırem kentine jumys saparymen baryp qaıtqan bolatyn. Bul eldi mekenderdiń basty problemasy aýyz sýdyń tapshylyǵymen baılanysty. Alaıda jıynǵa bas qosqan aqsaqaldar tek bul máselemen qosa basqa da qıyndyqtarǵa qatysty shaǵymdaryn jetkizdi. Olar onsyz da tapshy aýyz sýmen baqshadaǵy kókónis, jemisterin sýarý tirshilik nárin qorlaýmen birdeı dedi. Qarajal men Jáırem turǵyndary oblys basshylyǵyn sharýashylyq qajettilikterge kerekti tehnıkalyq sýdy jetkizý máselesin sheship berýdi ótindi.
Búgingi tańda Qarajal qalasy men Jáırem kentinde jalpy eseptegende 18 myńǵa jýyq adam turady. Turǵyndarǵa aýyz sý Ashyly jáne Tuzkól ken oryndarynyń jer asty sýynan tartylady. Alaıda sý qubyrlary tym eski, bul negizgi problema. Osyǵan deıin turǵyndarǵa aýyz sý keste boıynsha aptasyna eki ret, táýligine 1,5 saǵattan kóp emes ýaqyt aralaǵynda jiberiletin. Sý sorǵysyn jóndeýden ótkizgen soń sý taratý ýaqyty Qarajal qalasynyń turǵyndary úshin táýligine 12 saǵatqa deıin, al jáıremdikterge 13 saǵatqa uzartyldy.
2007 jyly qurylysy bastalǵan Tuzkól sý bógeti osy kúnge deıin iske qosylmaǵan. Jóndeý, ornatý jumystary 2012-shi jyldyń qarashasynda aıaqtalǵan, alaıda gıdravlıkalyq zerttemeler júrgizilgende sý taratqyshta jarylystar anyqtalǵan. Aýyz sý tapshylyǵyn tolyqtaı sheshý úshin Qaraǵandy oblystyq ákimdigi «KazSınk» AQ-men 15 shaqyrym plastık qubyrlar berý týraly kelisim jasaǵan. Sonymen qatar bıylǵy jyly Aımaqtardy damytý memlekettik baǵdarlamasy sheńberinde Jáırem kentinde jalpy somasy 900 mln teńgeni quraıtyn sý qubyrlaryn jóndeý jumystary bastalǵan. Ol jumystar 2018-shi jyly aıaqtalýy tıis, dep málimdedi Qaraǵandy oblysy ákiminiń orynbasary Anatolıı Shkarýpa.
Sondaı-aq josparda «Qarajal-Jáırem» sý taratqyshyn qaıta qalypqa keltirý tur. Bul joba respýblıkalyq bıýdjetten qarjylandyrylýy úshin jarııa etilgen. Alaıda ony osy jyldan bastap ketý kózdelip otyr. Nátıjesinde 2020-shy jylǵa qaraı Qarajal jáne Jáırem eldi mekenderinde sýmen qamtý sapaly, ári tolyqqandy bolýy tıis.