Abylaıhan úmitti aqtaı ma?

Este bolar, 2015 jyly Ka­tar­dyń astanasy Dohada ótken álem chempıonatynda bizdiń boks­shylarǵa altyn medal buıyr­maǵan edi. «Qazaq salmaǵy» – 69 kıloda Danııar Eleýsinov fı­nal­da marokkolyq Mohamed Rabı­den jeńilip, kúmis júldeni mise tutqan. Taǵy bir boksshymyz – aýyr salmaqtaǵy Ivan Dych­ko da «altyn» úshin bolǵan aıqas­ta fransýz Tonı Iokaǵa ese jiber­gen-di.

Al, kúni keshegi Tashkentte ót­ken Azııa chempıonatynda jalǵyz ǵana altyn júldemen kóńil jubattyq. Vasılıı Levıt bolmasa, qasyqtap jıǵan abyroıymyzdyń shelektep tógileri de ras edi. Saryqurlyqtyń sol dodasynda Abylaıhan Júsipov (69 kg), Erik Áljanov (81 kg), Qamshybek Qońqabaev (+91 kg) – kúmis, al Bekdáýlet Ibragımov (64 kg), Ábilhan Amanqul (75 kg), Qaırat Erálıev (56 kg) jáne Azamat Isaqulov (52 kg) qola medal ıegerleri atanǵan bolatyn. 

Álemdik doda aldynda Ulttyq quramanyń jattyqtyrýshylary sózge sarań, ashylyp syr aıta bermeıdi. Ujymnyń aldynda zor mindet, úlken jaýapkershilik turǵany aıtpasa da belgili. Tek, quramadaǵy jattyqtyrýshynyń biri Azamat Muqajanov bıylǵy chempıonattan tolyq medal jıyn­­tyǵyn ákelý josparda bar eke­nin aıtyp qaldy. Bul degenińiz – al­tyn, kúmis jáne qola medal ǵoı...

Sonymen, Gambýrgte 25 tamyz ben 3 qyrkúıek arasynda ótetin álem chempıonatyna Qazaqstan komandasy myna quramda óner kórsetedi: Erjan Jomart (49 kg), Azamat Isaqulov (52 kg), Qaırat Erálıev (56 kg), Ádilet Qurmetov (60 kg), Bekdáýlet Ibragımov (64 kg), Abylaıhan Júsipov (69 kg), Ábilhan Amanqul (75 kg), Erik Áljanov (81 kg), Vasılıı Levıt (91 kg) jáne Qamshybek Qońqabaev (+91 kg).

Bul boksshylardyń bári de álem chempıonatyna joldamany Tashkenttegi Azııa birinshiliginde mańdaı terin tógip aldy. Son­dyq­tan da, bul jerde «anaý nege bar­mady, mynaý nege bardy» deı­tindeı áńgime bolmaýǵa tıis.  Álbette, boksshylardy bóle-jaratyndaı oı bizde joq. Bárine de birdeı tilekshimiz. Degenmen, biz «qazaq salmaǵy» – 69 kılo salmaq dárejesine «shúıilýden» bul joly da aınalyp óte almaımyz. El namysyn bul salmaqta qorǵaıtyn jıyrma jastaǵy Abylaıhan Júsipov týraly az-kem aıta ketkendi jón sanasaq, bul nıetti bokssúıer qaýym da túsinistikpen qabyldaıdy degen senimdemiz.

Eresekter arasyndaǵy dodaǵa erte aralasqan Abylaıhan Jú­si­pov qazir ájeptáýir tájirıbe jı­naqtap aldy. Rıo-2016 Olım­pıadasyna qatysyp, Azııa chempıo­natynda aıqasqa tústi. Bir­neshe halyqaralyq týrnırler­de baq synap, súıegi qatqan saqa jigit­termen terezesi teń óner kór­setti. Júsipovke  jetpegeni osy tájirıbe edi, endi munyń da tolysqan túri bar syńaıly. Ma­mandar talantty boksshynyń boıyn­daǵy kemshin tustyń biri kádim­gi qara kúshtiń azdyǵy dep syn aıtyp júrgeni belgili. Al Aby­laıdyń ózi bolsa, dál qazirgi ýaqyt­ta bul másele túıininiń tolyq­taı sheshilgenin, fızıkalyq daıar­lyǵynyń tehnıkalyq sheber­ligimen qatar óskenin alǵa tartady. Álbette munyń shyndyqqa qan­shalyqty janasatynyn Gam­býrg rıngi kórseteri anyq.

Olımpıada chempıony, biz­degi 69 kılo salmaqty uzaq ýaqyt «bılep-tóstep» kelgen Da­nııar Eleýsinovtiń áýesqoı boksqa qaıta oralýy quramadaǵy jattyqtyrýshylar shtabynyń mazasyn alary sózsiz. Bas bapker Myrzaǵalı Aıtjanov gazeti­mizge bergen bir suhbatynda Danııar Eleýsinov keldi eken dep Abylaıhan Júsipovtiń salmaq aýystyrmaıtynyn aıtqan bolatyn. «Abylaıhannyń qazirgi salmaǵy 70 kılo. Al 64 kıloǵa deıin salmaq qýý durys emes dep esepteımin, – degen bolatyn Aıtjanov. – Jalpy, 69 kıloda báseke degenińiz qyzyp-aq tur. Munda Danııar men Abylaıhannan basqa Aslanbek Shymbergenov, Sadrıddın Ahmedov, Ilıa Och­kın jáne basqa da myqty boks­shylardyń bar ekenin umytpaý kerek. Bul salmaqta kimniń birinshi nómir bolatyny álem chempıonatynan keıin sheshiletin bolady. Qyrkúıekte oblys qurama komandalary arasynda  Konfederasııa kýbogy jolyndaǵy jarys bas­ta­lyp, ol jeltoqsanda márege je­tedi. Sonymen qatar, qarasha aıyn­da Qazaqstan chempıonaty ótedi. Mine, osy jarystardan keıin Ulttyq quramadaǵy birin­shi nómirdiń kim ekendigi anyq­talady...».

Árıne, áıgili 69 kılo salmaqta óziniń ústemdigin ustap turý Aby­laıhan Júsipov úshin ońaıǵa soqtpaıtyny belgili. Aldyn­da alynbas qamaldaı bolyp Olım­pıada chempıony tur, sońyn­da dúbiri jer jaryp jas bóri­ler keledi. Bul óz aldyna, al syrt­taǵy «Áp bálem, seni me?!», degen azýly qarsylastar qanshama de­seńizshi?! Gambýrgtegi álemdik dodada Abylaıhandy Eýropanyń bıylǵy chempıony nemis Abbas Baraý, Rıo Olımpıadasynyń kú­mis júldegeri ózbek Shahram Gııa­sev, Eýropa chempıonatynyń kúmis júldegeri aǵylshyn Pet Mak­kormek kútip tur.  Dese de, bizdiń jigit ózine se­nimdi sııaqty. «Germanııaǵa men jal­ǵyz maqsatpen – altyn medal alý úshin baramyn», deıdi. 

Qalaı bolǵan kúnde de, Al­ma­nııadaǵy álem chempıonaty Abylaıhan Júsipov syndy da­ryndy boksshynyń sporttyq karerasyndaǵy taǵdyrsheshti týrnır bolǵaly tur. Topty jaryp shyǵar bolsa, Tokıoǵa – 2020 jylǵy Olımpıadaǵa aparar týra joldyń qaqpasy aıqara ashylaıyn dep tur-aý.  «Básekeden qorqatyn men emes!», deıdi Abylaıhan. Jón, básekeniń bolǵany jaqsy. Ár salmaqqa dál osy 69 kılodaǵydaı áıdik báseke tilegimiz keledi. Biz­diń sporttyń, onyń ishinde bok­sy­myzdyń kósegesin kógertse – osy báseke kógertedi!

Qaırat ÁBILDA, «Egemen Qazaqstan»