Álemge áıgili ánshi, Qazaqstannyń halyq ártisi Dımash Qudaıbergen týraly derekti fılm 30 mamyr kúni Ispanııa astanasy Madrıd qalasynda alǵash ret kórermenge jol tartpaq. «Al compás de su voz» (Onyń daýys yrǵaǵymen) dep atalatyn bul týyndynyń bastamashysy – ıspanııalyq jankúıerler, al júzege asyrýshysy – «Dimash Qudaibergen Fan Club Oficial Spain-La Gran Voz Kazaja» qaýymdastyǵy. Fılmniń premerasy Madrıdtiń Hortaleza aýdanyndaǵy «Palacio de Hielo» kesheninde ótpek.
Atalǵan joba jumysy 2024 jyldyń qazan aıynda bastalyp, shamamen eki jylǵa jýyq ýaqytty qamtyǵan. Derekti fılmge
20 saǵattan astam beınematerıal, arhıvtik jazbalar, fotosýretter men suhbattar engizilgen. Týyndyda álemniń ár túkpirinen jınalǵan bes jankúıerdiń jeke oqıǵalary baıandalady. Avtorlar olardyń ánshimen rýhanı baılanysyn, sondaı-aq Dımashtyń halyqaralyq fan-qoǵamdastyǵy ishindegi erekshe atmosferany kórsetýge tyrysqan.
Osy jańalyqty estigen soń, áleýmettik jeliden ıspanııalyq kınematografıst Davıd Kollantes Rodrıgeske habarlastyq. Onyń aıtýynsha, fılmniń basty ıdeıasy – Dımashtyń óneri mıllıondaǵan adamnyń ómirine qalaı áser etkenin kórsetý bolmaq. «Bul jobada árbir jankúıerdiń jeke tarıhy arqyly ortaq bir qubylysty, ónerdiń adamdardy biriktirý kúshin ashýdy kózdedik. Ár adamnyń Dımashpen tanysýynyń óz tarıhy bar. Bul – meniń alǵashqy tolyqmetrajdy jumysym. Al alǵashqy dúnıeler árdaıym erekshe bolady», deıdi ol.
Fılmde Dımashtyń Ispanııadaǵy alǵashqy konserti (Barselona, qarasha aıy), sondaı-aq 50 elden kelgen 700-den astam jankúıer qatysqan arnaıy kezdesýler de qamtylǵan. Avtorlar týyndy arqyly ánshi shyǵarmashylyǵyn keńinen nasıhattap, ony shyn máninde jahandyq mádenı fenomen retinde tanytýdy maqsat etedi.