«Borodıno» sharýa qojalyǵynyń basshysy 1997 jyly aýyldaǵy Mádenıet úıin aýksıonnan bar bolǵany myń teńgege satyp alyp, kóziniń qarashyǵyndaı saqtap, qarap, kútip, baptap, qyzmetkerleriniń aqshasyn tólep, 2010 jyly memleketke qaıtaryp beripti. Egemendiktiń áýelgi jyldarynda ıesiz qalǵan balabaqshany 2002 jyly, feldsherlik pýnktti 2013 jyly aýyldastaryna tegin tartý etipti. Aýyldyń sýy men jaryǵynyń aqshasyn da áli kúnge deıin ózi tóleıdi eken.
«1997 jyldyń 17 naýryzynan beri osy aýylda turyp kelemin. Eń alǵash osynda kelgenimde keńshardyń 70 mıllıon qaryzy boldy. 10 jylda qaryzdardyń barlyǵyn tólep shyqtyq. Mádenıet úıin qalaı satyp alǵanymyz da áli kúnge deıin esimde. Bireý shatyryn, bireý terezesin, bireý edenin surap, esimizdi shyǵardy. Eshkimge bermedik. Aman-esen saqtadyq. О́ıtkeni, bul – eldiń dúnıesi. Eldiń ıgiligine jumys isteıtin nysandar ǵoı. Eń bastysy, bul mekemeler aýyl halqy úshin jumys istese deımiz», deıdi aýyldastarynyń alǵysyna bólengen kásipker.
Alǵys demekshi, jaqynda osy aýylǵa arnaıy barǵanymyzda eldi mekendegi turǵyndardyń barlyǵy Qaırat Bókejanovqa rızashylyqtaryn bildirip, jyly lebizderin jetkizip jatty. Osydan birer jyl buryn «Eren eńbegi úshin» medalimen marapattalǵan, kásipkerdiń sharýa qojalyǵyna qarasty taýarly-sút fermasynyń brıgadıri Olga Borodavkına bul aýylǵa 1998 jyly kelgenin aıtady.
«Áýelde eden jýýshy boldym. Ol kezde 24 jasta edim. Sol ýaqyttan beri Qaıratpen birge eńbek etip kelemiz. Kórgen jaqsylyǵymyz kóp. Aýyl turǵyndary úshin aıanyp qalǵan kezin kórgen joqpyn. Men ony aýyldyń ıesi dep sanaımyn. Problemasy bar eldiń bári eń aldymen osynda keledi. Kóshe tazalanbasa da osynda keledi. Qysta boranǵa qamalǵan kisi de eń áýeli osynda jetedi. Osy aýyldyń TJM da, polısııasy da – Qaırat Bókejanov. Aýyldyń barlyq máselesi osynda sheshiledi», deıdi ol.
Osy aýylda 46 jyl malshy bolyp, bıyl zeınetke shyqqan Alekseı Toıkenov Qaırat Bókejanov alǵash aýylǵa kelgende 114 sıyr bolǵanyn eske alyp, búginde saýyn sıyrdyń ózi 400 basqa jetkenin maqtanyshpen aıtady. «1998 jyldan beri tize qosyp jumys istedik. Eshqandaı ókpemiz joq. Qashan kelseń de kómegin aıaǵan emes. Aýyldy kóterdi. Oǵan bárimiz rızamyz», deıdi aqsaqal.
Malshylarǵa arnalyp bes úı salynyp jatyrAýyldaǵy 500-ge jýyq turǵynnyń 100-den astamy «Borodıno» JShS-nde eńbek etedi eken. Eldi meken turǵyndarynyń sany da jyldan jylǵa artyp kele jatqan kórinedi.
«Bul kisi aýyldy ustap otyr deýge bolady. Qaırat Bókejanov bolmasa, aýylda jumys ta bolmas edi. Jumysshylarǵa barlyq jaǵdaı jasalǵan. Olardyń túski tamaǵynyń quny bar bolǵany 120-150 teńge aralyǵynda ǵana. Osyny basqa aýyldardaǵy kisilerge aıtsań tańǵalady. Senesiz be, senbeısiz be, qazir bizdiń aýylǵa jumysshylar jetpeı jatyr. Byltyr osynda aýdannyń túkpir-túkpirinen 90 adam kóship keldi. Aýylda birde-bir bos úı joq. Jumys oryndary bar, jumys isteıtin kisi bolmaı otyr», deıdi «Borodıno» JShS-niń býhgalteri Marjan Altaıbekova. Qazirgi ýaqytta aýylda eki páterli bes úıdiń qurylysy bastalyp ketipti. Úsh bólmeden turatyn bul úılerge negizinen osyndaǵy «Borodıno» sharýa qojalyǵynyń jumysshylary – malshylar, saýynshylar, mehanızatorlar, shópshiler men eginshiler, traktorshylardy qonystandyrý josparlanyp otyr. Bes úıdiń jobalyq-smetalyq qujattarynyń qarjysyn Qaırat Bókejanov óz moınyna alypty.
«400 basqa arnalǵan taýarly-sút fermasyn aldaǵy ýaqytta 800-ge deıin ulǵaıtý josparda bar. Myna 5 úı sol úshin salynyp jatyr», deıdi sharýa qojalyǵynyń basshysy.
Reti kelgende aıta keteıik, Zyrıan aýdanynda «Rýhanı jańǵyrý» aıasynda júıeli jumystar qolǵa alynyp, arnaıy baǵdarlama jasalypty. Aýdan ákiminiń orynbasary Janna Asqarovanyń aıtýynsha, kúnbaǵysy kóp óńirdiń aýyldyq okrýgterinde aptasyna bir ret úlken is-shara uıymdastyrylyp, oǵan sol eldi mekenniń barlyq turǵyndary qatystyrylatyn kórinedi. Shara tań atqannan kún batqansha sozylyp, sol aýyldyń barlyq jetistikteri pash etilip, aqsaqaldarǵa qurmet kórsetilip, baǵdarlama sońy mádenı-tanymdyq keshpen aıaqtalady eken.
Azamat QASYM, «Egemen Qazaqstan»
Shyǵys Qazaqstan oblysy, Zyrıan aýdany
Sýrette: Q.Bókejanov (sol jaqtan tórtinshi) aýyldastarynyń ortasynda