Elordada ótken «Astana daýysy» birinshi halyqaralyq festıvali qala qonaqtary men turǵyndaryna umytylmas áserli kesh syılady. Kóptegen radıostansııalar men hıd-paradtar reıtınginde kósh bastap turǵan álemdik juldyzdar jandy daýysta án saldy.
Saltanatty rásimdi tamashalaýǵa Prezıdent ákimshiliginiń jetekshisi Ádilbek Jaqsybekov, Mádenıet jáne aqparat mınıstri Arystanbek Muhamedıuly jáne Astana ákimi Áset Isekeshev keldi.
Festıval shymyldyǵyn ashqan qala basshysy kesh qonaqtaryna sáttilik pen tabys tiledi. Sondaı-aq, «Astana daýysy» festıvalinde eldiń mádenı ómirinde ózindik orny bar belgili ánshi Qaırat Nurtasqa estelik músin tabystap turyp, mundaı festıvalderdiń elaralyq mádenı baılanystardy tereńdetýde yqpaly zor ekenin atap ótti.
– Elimizde osyndaı sharanyń ótkizilgenine qýanyshtymyn. Búgin túrli memleketterdiń tanymal ánshilerimen bir sahnada óner kórsettim. Osy keshte Grıgorıı Lepspen tanystym. Kúzge salym josparlap otyrǵan jeke konsertimde birge óner kórsetemiz,– dep kúldi Qaırat Nurtas. – Mundaı sharalar túrli mádenı yntymaqtastyq ornatýǵa múmkindik beredi. Bul – qajetti is, men ony qoldaımyn.
Sahnaǵa alǵashqylardyń biri bolyp shyqqan ýkraınalyq Svetlana Lobodany kórermen ystyq yqylaspen qarsy aldy. Mýz-TV 2017 premııasynda «Úzdik án» atalymy boıynsha júldeli oryn alǵan «Tvoı glaza» ánimen keshtiń ajaryn asha tústi. Úzilis arasynda ánshi festıvaldiń ómirsheń bolýyna tilektestik bildirdi.
– Men Astanany jaqsy kóremin, jaqyn arada Astanada jeke konsertimdi beremin dep oılaımyn. Barlyq uıymdastyrýshylarǵa osyndaı ádemi sharalar ótkizýdi tileımin, bul asa qajet nárse, – dedi Svetlana. Munymen qosa, artıst alǵash ret qazaq ulttyq taǵamdarynan dám tatqanyn, sondaı-aq, Astanada ulttyq taǵamdardyń erekshe mádenıeti qalyptasqanyn atap ótti.
Saltanatty shara barysynda albanııalyq Arilena Ara, Nıderlandy artısi Eva Simons, shvesııalyq Arash, Grýzııadan Hvıcha Kvarashelııa, rýmynııalyq DJ Sava syndy juldyzdar ónerin ortaǵa saldy. Belorýs ánshisi «Bıankanyń» «Mýzyka» kompozısııasyn kórermen qaýym shattana qabyl aldy. Onyń izin ala sahna tórine Túrkııadan kelgen Ilyas Yalcintas, moldavııalyq Sunstroke Project jáne AQSh ókili Polina shyqty. Dýmandy keshtiń sońyn qonaqtar taǵatsyzdana kútken ánshi Grıgorıı Leps qorytyndylady. Ánshilerdiń árqaısysyna mýzyka salasynyń damýyna úles qosqandary úshin dıplom men estelik músinder tabys etildi.
Festıvaldi tamashalaǵan qonaqtar da úzilis arasynda óz pikirlerimen bólisip jatty. Solardyń arasynda keshti tamashalýǵa kelgen Mýz-TV telearnasynyń bas dırektory Arman Davletıarov mýzyka merekesin tartý etken qala ákimdigine alǵysyn jetkizdi.
– Birinshiden, Qazaqstanǵa kelgenime qýanyshtymyn, munda álem elderiniń eń úzdik artısteri bas qosty. Men olardyń árqaısysymen tanysyp, estelik sýretke túsýge nıettimin. Tipti, Reseıde de mundaı deńgeıdegi festıval ótken emes, sol sebepti uıymdastyrýshylarǵa, qala ákimdiginde osyndaı mýzyka merekesin tartý etkenderi úshin alǵys aıtamyn. Osy joly Qazaqstanǵa menimen birge eki ulym keldi, olar munda bolǵan emes. Ekeýi tańerteńnen beri ekskýrsııaǵa baryp, keıin túnimen kórgenderin áńgimelep shyǵady. Alǵan áserleri keremet. Dombyra, qamshy, jebe satyp alypty. Qonaq úıdegi bólmemiz shaǵyn kıiz úıge aınalǵandaı. Uldarym úıge qaıtqysy kelmeıdi. Astanaǵa taǵy da kelýge asyq. Sol sebepti jyly qabyldap, qurmet kórsetken qazaqstandyqtarǵa myń alǵys,– dep aǵynan jaryldy Arman Davletıarov.
Aıa О́MIRTAI,
«Egemen Qazaqstan»