Sońǵy kezderi fýtbolda erekshe talantymen kózge túsip júrgen madrıdtik «Realdyń» jas oıynshysy Marko Asensıo týraly ne bilemiz?
Marko Asensıo – 1996 jyly 21 qańtarda Ispanııanyń Palma qalasynda bask-golland otbasynda týǵan. «Malorka» fýtbol klýbynyń akademııasynan túlep shyqqan. Úlken fýtboldaǵy debıýtin 2013 jyldyń 27 qazanynda Ispanııanyń ekinshi lıgasy Segýndada «Rekreatıvo» komandasyna qarsy ótkizdi. Al úlken fýtboldaǵy eń alǵashqy golyn 2014 jyldyń 16 naýryzynda «Tenerıfe» qaqpasyna saldy.
«Real Madrıd» komandasynyń skaýttary Marko Asensıony jiti nazarda ustap kelgen. Al talantyna joǵary baǵa bergen klýb basshylyǵy sol jyly onymen kelisimshart jasaıdy. 2014 jyly jeltoqsan aıynda jasalǵan kelisim boıynsha ol keler jyldyń jazynda koroldik klýbtyń oıynshysy atandy. Alaıda «Real» basshylyǵy Markony kóbirek alańǵa shyǵyp, tájirıbesin arttyrýy úshin deńgeıi tómendeý «Espanol» komandasyna jalǵa berýdi jón kóredi. Bul komandada júrip ol 19 qyrkúıek kúni «Real Sosedad» klýbyna qarsy matchta alańǵa shyǵyp, La lıgadaǵy debıýtin ótkizedi. Al 2016 jyldyń 20 aqpan kúni «Deportıvo La-Korýnıa» qarsy matchta mergendigimen kózge túsip, «Espanol» sapyndaǵy birinshi golyn soǵady.
Bir jyldyq jalǵa berý merzimi aıaqtalǵannan keıin, ıaǵnı 2016 jyldyń jazynda Marko Madrıdke qaıta oralady. Munda bas bapker Zınedın Zıdan shákirtiniń ónerine tań qalyp, eshqaıda jibermeýdi jón kóredi.
«Realdaǵy» alǵashqy maýsymy
О́tken jyldyń tamyz aıy Marko úshin sátti ótti deýge bolady. Madrıdtik klýbtyń sapynda alǵashqy oıynyn sol jyldyń 9 tamyzy kúni ÝEFA Sýperkýbogynda «Sevılıa» komandasyna qarsy ótkizedi. Ári osy matchta birinshi golyn soǵady. Sondaı-aq, «Realmen» birge karerasyndaǵy birinshi kýbogyna qol jetkizdi. 2016 jyldyń 21 tamyzda Asenıso «Real Sosedadqa» qarsy kezdesýde alańǵa shyǵyp, La lıgadaǵy debıýtin ótkizdi.
Asensıonyń talantyn Zıdan joǵary baǵalap, kóbirek múmkindik berdi. О́tken jyldyń 18 qazanynda Polshanyń «Legııa» komandasyna qarsy oıynda kezekti ret mergendigimen tanylyp, Chempıondar lıgasyndaǵy (ChL) birinshi golyn soqty. Naǵyz talant syn sátterde shyńdalady. Marko tek osal komandalarǵa ǵana emes, Eýropanyń birneshe alpaýyt ujymdaryn da qapy qaldyryp jatty. Máselen, ChL-nyń 1/4 fınalynda Mıýnhenniń «Bavarııasyn», fınaldyq kezdesýde Italııanyń «Iýventýsin», Ispanııa Sýperkýbogynda «Barselonany» san soqtyryp ketti.
«Realda» bir jyl ishinde eki márte ÝEFA Sýperkýbogyn, sondaı-aq, klýbtar arasyndaǵy álem chempıonatyn, Ispanııa chempıonatyn, Chempıondar lıgasy men Ispanııa Sýperkýbogyn jeńip aldy.
«Ol Madrıdte ózin jaıly sezinedi. Onyń kúndelikti progresin kórip, tańdanysymdy jasyra almadym. Alańda barlyq tapsyrmany tyńǵylyqty oryndaıdy. Birneshe qarsylasynan aılasyn asyra biledi. Qajet kezinde joıqyn soqqylaryn baǵyttaıdy», degen edi Zınedın Zıdan «Barselonaǵa» qarsy ótken Ispanııa Sýperkýbogynyń alǵashqy oıynynan keıin.
Ispanııa quramasyndaǵy jetistikteri
Marko Asensıo 2015 jyly 19 jasynda Ispanııa jastar quramasymen birge Grekııada ótken Eýropa chempıonatynyń jeńimpazy atandy. Týrnırde «qyzyl fýrııa» komandasy Nıderland, Fransııa, Reseı (eki ret), Germanııa quramalarymen kezdesti. Jartylaı fınalda Asensıo Fransııany eki márte qapy qaldyrdy.
О́tken jyldyń 29 mamyrynda Bosnııa jáne Gersegovına ujymyna qarsy oıynda Ispanııa quramasy sapyndaǵy debıýtin ótkizdi. Al bıyl Polshada ótken jastar arasyndaǵy Eýropa chempıonatynda Ispanııa quramasymen birge kúmis júldege qol jetkizgen bolatyn.
Marko Asensıo – «Barselona»
21 jastaǵy jartylaı qorǵaýshyny 2014 jyly «Realdyń» áıgili qarsylasy «Barselonanyń» óz qataryna qosýyna múmkindigi bolǵan edi. Biraq, katalondyq klýbtyń basshylyǵy ıspanııalyq oıynshy úshin 4,5 mln eýro tóleýdi qymbatsynǵan. Alaıda, sol jyly «Barselona» Brazılııanyń «San Paýlý» komandasynan esimi eshkimge belgisiz Dýglasty alty mıllıon eýroǵa satyp aldy.
«Barselona» Neımardyń «Parı Sen Jermen» komandasyna aýysyp ketýine baılanysty ornyna birneshe fýtbolshyny qarastyrǵan bolatyn. Tizimniń ishinde Marko Asensıo da boldy. Bul joly katalondyq klýb 80 mln eýro usynýǵa daıyn ekendigin bildirgen. Alaıda, ol «Realdyń» tikeleı qarsylasyna aýyspaıtynyn kesip aıtty.
«Men «Barselonanyń» jeıdesin eshqashan kımes edim. Maǵan ózge de klýbtardan usynys túsken. Biraq Madrıdtegi ómirime rızamyn», dedi Asensıo Ispanııanyń El Larguero radıosyna bergen suhbatynda.
Aıta keteıik, keshe Ispanııa birinshiliginde «Valensııa» komandasyna eki gol soǵyp, «Realdy» jeńilisten qutqaryp qaldy.
Daıyndaǵan Aıan ÁBDÝÁLI, «Egemen Qazaqstan»