Taıpeıde ótip jatqan HHIH Jazǵy ýnıversıadanyń toǵyzynshy jarys kúninde qazaqstandyq jeńil atlet Sergeı Grıgorev syryqpen sekirýden 5 metr 50 santımetrdi baǵyndyryp, kúmis júlde jeńip aldy.
Bul synda altyn medal portýgalııalyq atlet Dıogo Ferreıraǵa buıyrdy. Onyń kórsetkishi – 5,55 metr. Al úzdik úshtikti 5,40 metr nátıjemen ıtalııalyq sportshy Klaýdıo Stekı túıindedi.
Sonymen, búgingi kúnge deıin Qazaqstan quramasynyń qorjynyna 3 altyn, 5 kúmis jáne 6 qola júlde tústi. Jalpykomandalyq esepte bizdiń sportshy stýdentter 14 medalmen 17-shi orynda keledi.
Bul synda Japonııa quramasy kósh tizginin berer emes. Qazirgi ýaqytta Kúnshyǵys eli stýdentteriniń enshisinde 78 medal bar (30 altyn, 20 kúmis jáne 28 qola). Ońtústik Koreıa sportshylary 71 júldemen (27, 18, 26) ekinshi orynda tur. Al úshinshi satyǵa taban tiregen Taıvan quramasynyń qorjynynda 67 medal bar (18, 28, 26).
Keshe Taıpeıdegi stýdentter saıysynda óner kórsetken bir top qazaqstandyq sportshy elge oraldy. Olardyń arasynda Jazǵy ýnıversıadanyń chempıondary ziltemirshi Denıs Ýlanov, Aıdar Qazov jáne Albert Lınder boldy. Sportshylardy Almaty áýejaıynda qarsy alǵan jankúıer qaýym el namysyn laıyqty qorǵaǵan jeńimpazdar men júldegerlerge laıyqty qoshemet kórsetti.
«О́zimniń kórsetken ónerime kóńilim toldy. Jarysqa júlde alamyn dep nyq senimmen baryp edim», dedi BAQ ókilderine bergen suhbatynda Albert Lınder.
Sonymen qatar, Ýnıversıadadan alǵan áserimen saıystyń kúmis júldegeri, taekvondoshy qyzymyz Jansel Denız de bólisti. «Meniń fınaldaǵy qarsylasym óte myqty sportshy boldy, ózi Azııa chempıony. Sheshýshi jekpe-jekte tájirıbe tarazy basyn tartyp ketti. Degenmen, men ózim úshin kóptegen jańalyq ashtym. Bul Ýnıversıada synynda alǵan tájirıbem bolashaqtaǵy jeńisterime baspaldaq bolady degen senimdemin», dedi Túrkııada týyp, óziniń tarıhı Otanyna oralǵan erjúrek qyz.
Erteń HHIH Jazǵy ýnıversıada óziniń máresine jetedi.
Qaırat ÁBILDA, «Egemen Qazaqstan»