Ár memlekettiń aıbaryn aspandatyp, eldigin qýattaıtyn negizgi qujaty – onyń Konstıtýsııasy.
Táýelsizdigimizdi tuǵyrly, birligimizdi ǵumyrly etip, qoǵamdaǵy tatý ómirdiń qaǵıdasyn qalyptastyratyn da osy qujat. Sondyqtan bul kúnniń mańyzy esh merekeden bir saty da tómen emes. Táńirden táleıimizge buıyrǵan táýelsizdigimizdiń tátti tańynyń atqanyna da attaı 25 jyl toldy.
Osy jyldar ishinde jańa ári qýatty memlekettiń qalyptasýy úshin qanshama qajyrly eńbek jumsalyp, táýekeldi bastamalar jasaldy. Kez-kelgen elmen ıyq tirestirip, terezemiz teń dárejede sóılese alatyn jaǵdaıǵa jettik. Otanymyz tatýlyq pen yntymaqtyń kıeli besigine aınaldy. Munyń báriniń oıdaǵydaı iske asýyna taıǵa tańba basqandaı etip jazylǵan ardaqty Ata zańymyzdyń tıgizgen yqpaly zor dep aıtar edim.
Sebebi, memleket damýynyń qaı salasynda bolsyn temirdeı tártip pen ortaq zań bolmasa alǵa qaraı jyljý múmkin emes. О́ndiris te, rýhanııat pen ekonomıka da Ata zańnyń aıasyna baǵyna otyryp damıdy. Mektep tabaldyryǵyn ımene attaǵan árbir jas bastaýysh synyptyń qabyrǵasynda júrgen kezde-aq Ata zańnyń, ana tildiń qasıetin boıyna darytýy tıis. Ata zańyn ardaqtaǵan azamat, ata saltyn da qurmetteı alady. Tumardaı qasterli qujattyń qundylyǵyn árbir jas urpaq sezinse, jan dúnıesimen uǵynsa deımin.
Aıagúl MIRAZOVA, Qazaqstannyń Eńbek Eri