Elordadaǵy Ońtústik kúnderinde «EKSPO-2017» halyqaralyq kórmesin tamashalaýǵa kelgen qonaqtar ońtústiktiń erekshe syıyna kýá boldy, dep habarlaıdy oblys ákiminiń baspasóz qyzmeti.
Iаǵnı, bas qalanyń tórinde ońtústikqazaqstandyq ónertapqysh Erkinbek Bókebaev oılap tapqan «Qazaq Arbasy»-nyń eki danasy qoıylyp, onda ulttyq sýsyndarymyz - qymyz, qymyran jáne qurt, tústik aımaqtyń darhan dalasynda pisip jetilgen jemis-jıdekter sharaǵa kelýshilerge tegin taratyldy.
Astanadaǵy «Báıterek» alańynyń mańynda uıymdastyrylǵan sharaǵa qala qonaqtary men sheteldik meımandar kóptep keldi. Alǵashynda tegin taratylǵan taǵamdarǵa tań qalǵan halaıyq, keıinnen ońtústiktiń myrzalyǵyna tánti bolyp, alǵysyn bildirdi.
Is-sharany uıymdastyrýshylardyń aıtýynsha, ońtústiktiń Astanaǵa tartýy ármen qaraı da, kúngeıdiń teriskeıdegi mádenı kúnderi aıaqtalǵansha jalǵasady.
Aıta óteıik, Elbasy Nursultan Nazarbaev «Bolashaqqa baǵdar: rýhanı jańǵyrý» baǵdarlamalyq maqalasynda ulttyq kodty saqtaı bilý arqyly ulttyq sanany jańǵyrtý qajettigi jónindegi tapsyrmasyna oraı, ońtústikqazaqstandyq ónertapqysh Erkinbek Bókebaev dástúrdi saqtap qalýdyń tyń úlgisi retinde qazaqtyń eski pishindegi arbasynyń ústine kıiz úıdi qondyrǵan jyljymaly dúńgirshek - «Qazaq Arbasy»-syn oılap tapqan-dy. Bul arba qazaqtyń qymyz-qymyran sekildi ulttyq sýsyndaryn satýǵa arnalǵan.