Búgin Máskeýde úlken Nıkıtskıı kóshesinde Mıanma elshiliginiń aldynda mıtıng ótip jatyr, dep habarlaıdy birqatar reseılik basylymdar.
Basylymnyń jazýynsha, musylman senimindegi ondaǵan adam jınalyp, Mıanma áskerı úkimetiniń musylmandardy qýdalaýyna qarsylyq bildirýge shyqqan. Elshilik aldynda Mıanmadaǵy musylmandarǵa qoldaý bildirýge shyqqandar sany saǵattap artyp barady. Olar «Allahý ákbar» dep urandap, Mıanma bıligin terrorızm dep aıyptaýda. Máskeýlik quqyq qorǵaý organdary oqıǵany jiti baqylaýǵa aldy.
Eske sala ketsek, Mıanmada býddıster men musylmandar arasyndaǵy qaqtyǵys saldarynan bir apta ishinde elde 402 adam qaza taýyp, jergilikti turǵyndar bosyp ketken. Qazaqstandyqtar áleýmettik jelilerde #arakan #rohingnya #arakan #prayforrohingya heshtegterimen musylmandarǵa qoldaý, demeý maqsatynda jazba qaldyryp jatyr.