Gennadıı «GGG» Golovkın men Saýl «Kanelo» Alvares arasyndaǵy jekpe-jek Los-Andjelestegi talaı dodanyń kýási bolǵan T-Mobile arenasynda ótti.
Kásipqoı boks áleminde zor qyzyǵýshylyq týdyrǵan bul aıqasty 20 myń adam sport saraıynda otyryp tamashalasa, televızııa arqyly qyzyqtaǵan jurt san mıllıondardan asyp ketti.
О́zbekstanda memlekettik saparmen júrgen Qazaqstan Prezıdenti Nursultan Nazarbaev ta Amerıka Qurama Shtattaryndaǵy Las-Vegasta WBA, WBC, IBO, IBF jáne The ring tujyrymdary boıynsha bokstan álem chempıony ataǵy úshin ótken Gennadıı Golovkınniń Saýl «Kanelo» Alvarespen jekpe-jegin tikeleı efırden kórip, otandasymyzǵa quttyqtaý jedelhatyn joldady.
«Mıllıondaǵan qazaqstandyqtar saǵan bir aýyzdan qyzý qoldaý kórsetti. Sen tartysty ári jankeshti jekpe-jekte aıryqsha tabandylyq tanytyp, qajymas qaırat pen asqan sheberlik kórsettiń.
Seniń kásipqoılyǵyń, zor qabiletiń, qol jetkizgen abyroı-bedeliń, eń bastysy – óz isińe sheksiz adaldyǵyń keleshektegi jarqyn jeńisterińniń kepili bola bersin», – delingen jedelhatta.
Sońynda Nursultan Nazarbaev boksshyǵa zor densaýlyq jáne aldaǵy belesterine tabys tiledi.
Jekpe-jek qazaqstandyq sportsúıer qaýymǵa da taqym qystyryp qoıǵan edi. Boks degen bekzat ónerińiz birinshi nómirli sport túrine aınalǵan eldiń eńbektegen balasynan, eńkeıgen kárisine deıin bul shaıqasty demin ishine tartyp, degbirsizdene kútti. Tipti, Memleket basshysy Nursultan Nazarbaevtyń ózi 14 qyrkúıek kúni BAQ ókilderimen bolǵan baspasóz máslıhatynda «Bul – Qazaqstan halqy úshin úlken oqıǵa! Ol bárimizdi teledıdar aldyna jınaıdy. Bizdiń jerles GGG-diń ataǵy men dańqy qazir jer jaryp tur. Bul – óte mańyzdy kezdesý. Meksıkalyq Alvares – óte tanymal, sheberligi joǵary boksshy», dep atalǵan boks matchyna erekshe mańyz bergen bolatyn.
Kásipqoı bokstaǵy orta salmaqtyń «áýlıesin» anyqtaıtyn osy jekpe-jekti Gennadıı Golovkın boksshylardyń tilimen aıtqanda, «birinshi nómirmen» jumys istep, adýyndy túrde bastaǵan. Biraq qansha jerden shabýyldaǵanmen, onyń soqqylary kópke deıin meksıkalyq boksshyǵa darymaı dińkeletti. Al Alvares bolsa, ańdaı baǵyp, qarsylasynyń qapysyn tabýdy kózdedi. Iаǵnı ol kóbine qorǵanysta júrip, qarsy shabýylmen qarymta qaıtarý taktıkasyn ustandy. Jeme-jemge kelgende, bul jospar óz jemisin berdi de. Únemi alǵa umtylyp, ústemdigin údetkisi kelgen Golovkındi «Kanelo» arqanǵa arqasy tirelip tursa da birneshe márte tosyp alyp urdy. Jáne de ol Golovkınniń aýyr soqqylarynyń kóbin denesine darytpaı, qorǵanýǵa kelgende qamshy saldyrmaıtyn sheber ekendigin kórsetti.
Jalpy, bul jekpe-jekte 10-shy raýndtaǵy Alverstiń Golovkındi bir uryp, teńseltip jibergenin eseptemegende, sonshalyqty joıqyn soqqylar dóp tıip, boksshylar eseńgireıtindeı jaǵdaı bolǵan joq. Bulaı bolýy zańdy da edi. Nege deseńiz, sharshy alańda terezesi teń qarsylastar óner kórsetti. Birin-biri ábden zerttep, uzaq ýaqyt ańdysqan ákki qarsylastardyń jekpe-jeginen basqany kútýdiń ózi ábestik bolar edi. Eger de, eki boksshy saqtyqty ysyryp qoıyp, ashyq aıqasqa barǵanda – jekpe-jektiń taǵdyry basqasha sheshiler me edi, kim biledi?
Sonymen, 12 raýndqa túgel sozylǵan jekpe-jektiń taǵdyryn shesher sát te kelip jetti. Birinshi tóreshi Adalaıda Berd 118-110 esebimen jeńisti Alvareske berdi. Ekinshi qazynyń búıregi Golovkınge burdy, esep – 115-113. Al úshinshi tóreshi bolsa, eki boksshyǵa da birdeı upaı berip (114-114), tarazynyń basyn teńestirip qoıdy.
Árıne, bul sheshimge Saýl Alvarestiń kóńili tolmaǵany baıqalyp turdy. Ol óziniń basymdyǵyna tıtteı de kúmán keltirmegen edi jáne kezekti «jeńisin» Meksıkasynyń dál sol kúngi ulttyq merekesine arnaýdy maqsat etip shyqqan edi sharshy alańǵa...
Jekpe-jekten keıin rıngte turyp sóz alǵan Golovkın bylaı dedi: «Maǵan meksıkalyq boks máneri unaıdy. Dramaǵa toly shoý kórgim keldi. Búgin ol kóp bola qoıǵan joq. Árıne, shyndap tóbeleskim keledi. Men áli chempıonmyn!». Osyny aıtqannan keıin ol qazaqstandyq jankúıerlerge qarata «Alǵa, Qazaqstan!», dep urandatty. Alystan at arytyp kelgen jerlesterine «Úlken rahmet, jigitter!», dep qazaq tilinde alǵys aıtýdy da umytpady. Al Alvarestiń sózinen ókinish taby sezilip turdy. «Eshteńe de sezinbedim. Bul meni tańdandyrdy. Birinshi raýndta men ony tekserip kórdim, al odan keıin jeti-segiz raýndty sózsiz aldym. Qalaı josparladyq, solaı bokstastym. Árıne, qarymta jekpe-jekti qalaımyn. Eger jurt kórgisi kelse, isteımiz», dedi «Kanelo».
«Bárin aıt ta, birin aıt» degen, jekpe-jektiń qorytyndysyna rıza bolmasa da, eki boksshy rıngten oljasyz ketpedi. Birinshi orta salmaqtaǵy WBO tujyrymy boıynsha álem chempıony Alvares 5 mıllıon dollardy jambasqa bassa, bizdiń Golovkınge 3 mıllıon dollar buıyrdy.
Ádiline júginer bolsaq, bul jekpe-jekte Alvares jyldamyraq jáne áldileý kóringendeı boldy. Muny jekpe-jek qorytyndysyn shyǵarǵan soqqylar statıstıkasy da qýattaıdy. Máselen, bedeldi CompuBox júıesiniń deregine súıener bolsaq, Golovkın aıqas barysynda 703 soqqy jasaǵan eken. Sonyń 218-i dittegen jerine tıipti. Al «Kanelonyń» soqqysy kem shyqqan. Esesine, 505 soqqynyń 169-y Golovkındi dál tapqan. Budan bólek, kúsh salyp jasaǵan soqqylar statıstıkasy da kóp jaıtty ańǵartady. Máselen, Golovkın 342 kúshti soqqy jasap, onyń 110-yn qarsylasyna daryta alǵan (32,2%). Al Alvarestiń 272 joıqyn soqqysynyń 114-i dóp tıgen.
Sonymen, osyǵan deıin 37 jekpe-jek ótkizse de jeńilistiń ashy dámin tatpaǵan Gennadıı Golovkın atynyń basyn irikti. Degenmen ol óziniń tórt tujyrym boıynsha (WBA, IBF, WBC jáne IBO) chempıondyq ataqtaryn saqtap qaldy. Munyń ózi úlken olja: jeńiske para-par jetistik. Al birinshi orta salmaqta nebir sańlaqtardy qoǵadaı japyryp kelgen Saýl Alvares úshin bul teń túsý kóńil kónshitpeıtindeı nátıje bolýy ábden múmkin. Osyǵan deıin sharshy alańǵa 51 márte shyǵyp, bir ret jeńilip, bir jekpe-jekte ǵana teń túsken boksshy tek qana jeńem degen nyq senimmen kirisken bul jolǵy dodaǵa. Iá, otyzdyń ortan belinen asqan «ardager» boksshy men naǵyz der shaǵyndaǵy jampozdyń tóreshiniń sheshimine árqıly qaraýyn ábden túsinýge bolady. Bular ǵana emes, qazir álemniń aýzy dýaly mamandarynyń ózi qyryq pyshaq bolyp daýlasyp jatyr. Al promoýterlerdiń bir barmaǵy ishte búgýli...
Iá, shoý mindetti túrde jalǵasyn tabady. Kásipqoı bokstyń ıirimi jankúıer jazǵandy tereńine burynǵydan beter tarta túsip, aldaǵy ýaqytta «Qarymta qashan?» degizýmen degbirin alar túri bar.
Qaırat Ábilda, «Egemen Qazaqstan»