Fýtboldan Premer-lıga komandalary arasyndaǵy Qazaqstan chempıonatynyń senbi jáne jeksenbi kúnderi ótken 27-týr oıyndaryna kósh bastap kele jatqan «Astana» klýby qatyspaǵan edi.
Mundaı jaǵdaıdy óz paıdasyna sátti paıdalana bilgen Almatynyń «Qaıraty» syrt alańda oınaǵanyna qaramastan «Taraz» komandasyn 5:1 esebimen kúırete jeńip, ýaqytsha bolsa da kósh tizginin óz qolyna alǵan bolatyn.
Biraq «Qaırattyń» qýanyshy uzaqqa barmady. Keshe keshkisin Qyzylordada jergilikti «Qaısarmen» kezdesken «Astana» komandasy alań ıelerin 4:1 esebimen jeńip, top basyna qaıta shyqty.
Jalpy, ıspan mamany Karlos Ferrera kelgeli «Qaırat» komandasy upaı joǵaltqan joq. Qatarynan bes ret jeńiske jetken ujym altyn júldeden úmitin áli de bolsa úzbeı keledi. Biraq, bul jerde «Astananyń» almatylyqtardan eki oıyny kem ekenin esten shyǵarmaý kerek. Eger de «temirjolshylar» osy oıyndardaǵy múmkin bolǵan alty upaıdy túgel alatyn bolsa, onda basty básekelesin shańyna ilestirmeı keteri ábden múmkin.
Týrdan týrǵa «Shahterdiń» oıyny shırap keledi. Komanda óz alańynda «Oqjetpesti» 2:1 esebimen tize búktirip, 30 upaımen altynshy orynǵa kóterildi. Al sońǵy tórt oıynnyń bárinde jeńiliske ushyraǵan Kókshe fýtbolshylary kósh sońyna tústi.
Týrnır kestesinde quıryq tistesip kele jatqan «Aqtóbe» men «Atyraý» ózara kúsh synasyp, kim myqtyny anyqtaı almady. Tartysqa toly match 2:2 esebimen teń aıaqtalǵan bolatyn.
Týrdaǵy kútpegen nátıjeniń biri Pavlodarda tirkeldi. Jergilikti «Ertis» kósh sońynda kele jatqan «Aqjaıyqtan» 0:1 esebimen jeńilip qaldy.
Bul týrda qola júlde úshin kúresti jalǵastyryp kele jatqan «Tobyl» ózinen bir saty joǵary turǵan «Ordabasymen» teń oınap, mańyzdy degen eki upaıdan aıyryldy. Bul – Qostanaı fýtbolshylarynyń bıylǵy birinshiliktegi toǵyzynshy teń oıyny. Al ońtústikqazaqstandyq komanda úshin osy jolǵy teń oıynnyń olja bolǵany ras. О́ıtkeni, olar «Tobylmen» aradaǵy on upaı aıyrmashylyǵyn saqtap qala aldy.
27-týrdy Premer-lıga komandalary mynadaı nátıjelermen túıindedi:
«Ertis» – «Aqjaıyq» – 0:1 (0:0), Persýh, 73 (0:1). «Tobyl» – «Ordabasy» – 0:0 (0:0). «Taraz» – «Qaırat» – 1:5 (0:1), Goý, 18 (0:1). Islamhan, 53 (0:2). Islamhan, 65 – penaltıden (0:3). Qojamberdi, 83 (1:3). Anene, 87 (1:4). Arshavın, 89 (1:5). «Atyraý» – «Aqtóbe» – 2:2 (2:2), Valıýllın, 13 (0:1). Sıkımıch, 21 (1:1). Shımkovıch, 30 (1:2). Maksımovıch, 43 – penaltıden (2:2). «Shahter» – «Oqjetpes» - 2:1 (1:0), Stoıanovıch, 36 – penaltıden (1:0). Hleboýn, 76 (2:0). Bóleshev, 86 – penaltıden (2:1). «Qaısar» – «Astana» – 1:4 (0:0), Janǵylyshbaı, 46 (1:0), Grahovas, 60 (1:1), Shıtov, 66 (1:2), Logvınenko, 76 (1:3), Taǵybergen, 90 (1:4).
Kelesi 28-týr oıyndary qyrkúıektiń 23-24 kúnderi ótedi. 23 qyrkúıek: «Astana» – «Taraz», 24 qyrkúıek: «Aqjaıyq» – «Shahter», «Oqjetpes» – «Atyraý», «Qaırat» – «Tobyl», «Ordabasy» – «Ertis», «Aqtóbe» – «Qaısar».
Al munyń aldynda, ıaǵnı 20 qyrkúıek kúni 30-týrdyń úsh kezdesýi ýaqytynan buryn oınalady. Alań ústinde «Qaırat» – «Ordabasy», «Aqjaıyq» – «Atyraý», «Aqtóbe» – «Tobyl» komandalary kúsh synasatyn bolady.
Qaırat ÁBILDA, «Egemen Qazaqstan»