Qarashyǵanaq kenishiniń irgesinde, ekologııalyq aımaqta qalǵan Bestaý jáne Berezov aýyldary turǵyndaryn qaýipsiz jerge kóshirý sońǵy jyldary ózekti taqyryptyń biri edi. Býrabaıda ótken kezdesýde bul máselege Memleket basshysynyń ózi kóńil aýdaryp, kóshtiń jaıyn qadaǵalap suraǵan bolatyn.
Berezov pen Bestaý aýyldaryn kóshirý týraly áńgime qozǵalǵan soń-aq eki aýyldaǵy 400-ge taıaý otbasymen kezdesý ótkizilip, olardyń erik-tańdaýy belgili boldy. Osyǵan oraı Aqsaı qalasynda 9 qabatty eki úı arnaıy salynsa, «Araltal» shaǵyn aýdanynan jer telimi bar 100 turǵyn úı turǵyzyldy. Tipti aqshalaı ótemaqy alýǵa múmkindik berildi. Osylaısha, úlken kóshtiń basy byltyrdan bastalyp ketti.
О́tken jyldyń sońynda eki aýyldan 82 otbasy – jalpy sany 416 adam Aqsaı qalasyndaǵy 5 shaǵyn aýdanda ornalasqan 80 jáne 75 páterli turǵyn úıge kóshirildi. Áleýmettik álsiz topqa jatatyn jáne 2014 jyly 28 qarashada balalary ýlanyp, zardap shekken otbasylar jańa qonysqa aldymen kóshti.
Endi mine, qalǵan turǵyndar da ekologııasy qaýipti aýyldy tastap, jańa mekenge qonys aýdaryp jatyr. Aqsaı qalasynyń Qarashyǵanaq-1 shaǵyn aýdanynda salynyp jatqan 153 páterli 9 qabatty eki úıdiń qurylysy aıaqtalyp qalǵan. Munda bir bólmeli 36 páter, eki bólmeli 54 páter, úsh bólmeli 27 páter jáne tórt bólmeli 27 páter qarastyrylǵan, kólemderi sáıkesinshe 52, 68, 88 jáne 102 sharshy metr. Qurylysty aralap kórdik. Bólmelerdiń ishki árleý jumystary ǵana qalypty. Sonymen birge aýlany abattandyrý, balalardyń demalys oryndaryn ornatý, jol tóseý de qabat júrýde. Qurylysshylar qyrkúıektiń sońy, qazannyń basynda nysandy úı ıelerine tapsyratynyn aıtyp, ýáde berip otyr.
Bul jobany qarjylandyrýshy – Qarashyǵanaq Petroleým Opereıtıng bv konsorsıýmy. Turǵyndarǵa beriletin baspana qurylysynda bir adamǵa 15 sharshy metr talaby saqtalǵan. Osyǵan oraı Berezov aýylynda bir úıde turǵan keıbir otbasylar Aqsaıda sý jańa eki páter alyp jatyr. Munyń ústine ár shańyraqqa ótemaqy retinde ájeptáýir qarjy berilgen.
Aqsaı qalasynyń irgesindegi Araltal aýylynyń shetinde qatar-qatar boı túzegen 100 úıdiń sáýleti erekshe. Joba boıynsha 3 jáne 4 bólmeli etip salynǵan turǵyn úılerdiń kólemi sáıkesinshe 90 jáne 100 sharshy metrge jýyq. Atshaptyrym aýlasy, qosalqy sharýashylyq nysandary bar bul úılerdiń barlyq kommýnıkasııalyq jelisi jasalǵan, kireberis esikke deıin jol salynǵan. Qazirdiń ózinde munda 67 otbasy ornalasyp úlgeripti.
Budan bólek 320 orynǵa arnalǵan balabaqsha qurylysy da aıaqtalyp, shilde aıynda paıdalanýǵa berildi. Balabaqsha barlyq zamanaýı qural-jabdyqpen, oıynshyqtarmen qamtamasyz etilgen. Al 300 balaǵa arnalǵan jańa mektep qurylysy qazir qyzý júrip jatyr. Bul nysandy aldaǵy qazan aıynda aıaqtaý josparlanyp otyr.
Elbasynyń tapsyrmasymen berezovtyqtardyń jańa qonysqa jaıly ornalasýyn Batys Qazaqstan oblysynyń ákimi Altaı Kólginovtiń ózi tikeleı qadaǵalap keledi. О́tken senbide Aqsaı qalasyna arnaıy barǵan saparynda da jańa aýyldy bir aralap, jańa qonysqa kóship kelgen turǵyndarmen kezdesti.
Bir qyzyǵy, oblys basshysy men jýrnalıster toby jaqyndaǵanda, bir aýladan kóńildi áýen estildi. Sóıtsek, Berezov aýylynan jaqynda kóship kelgen Artyq pen Sara Qashıevter quda shaqyryp jatyr eken. Qudalary Ǵalym men Aısholpan Sháripovter de sol Berezov aýylynan kóship kelgen. Qudaı qosqan qudalardyń jańa qonystary da irgeles ornalasypty.
– Jańa úıimiz ózimizge qatty unady. Ne kerektiń bári bar, jaǵdaıymyz jaqsy. Mine, jańa qonysta alǵashqy qýanyshymyzdy toılap jatyrmyz, – deıdi úı ıesi Artyq Qashıev.
– Berezov pen Bestaý aýyldaryn kóshirý eń aldymen Elbasynyń tikeleı baqylaýynda turǵan másele. Biz Prezıdenttiń tapsyrmasyn oryndaýdamyz. Bul úılerdiń barlyǵy QPO b.v. kompanııasynyń qarajaty esebinen salyndy. Úılerdiń sapasyna da, kóshelerdegi jol qurylysyn júrgizýge de erekshe mán berildi. Endi sizder tek úılerińizdiń aınalasyn taza ustap, kógaldandyrý jumystaryna atsalyssańyzdar deımiz. Árıne, biz de óz tarapymyzdan qoldaý kórsetetin bolamyz, – dedi oblys ákimi turǵyndarmen kezdesýinde.
Qazbek QUTTYMURATULY «Egemen Qazaqstan» Sýretti túsirgen avtor