Májilis Tóraǵasy Nurlan Nyǵmatýlınniń jetekshilik etýimen ótken Palatanyń jalpy otyrysynda elimizdiń tranzıttik áleýetin arttyratyn eki zań jobasy maquldandy. Onyń ekeýi de О́zbekstan men Qazaqstannyń jáne Qazaqstan men Norvegııa Koroldiginiń arasyndaǵy avtomobıl qatynastaryn retteýge baǵyttalǵan.
Jıyndy ashqan Májilis Tóraǵasy osy kezge deıin elimizdiń kóliktik ınfraqurylymdaryn paıdalana otyryp, jahandyq logıstıkalyq júıeni qalyptastyrý maqsatynda О́zbekstan men Norvegııaǵa tıisti deńgeıde kelisimsharttar jiberilgendigin atap ótti.
«Mundaı qadam Elbasymyzdyń memleket aldyna qoıǵan negizgi tapsyrmalaryn oryndaý úshin óte mańyzdy bolyp tabylady. Sebebi, respýblıkamyzdyń tranzıttik áleýetiniń artýy – Qazaqstandy eýrazııalyq kólik-logıstıkalyq hab retinde tanyta túsedi. Bizdiń eldiń oǵan zor múmkindikteri bar», dedi N.Nyǵmatýlın.
Investısııalar jáne damý mınıstri Jeńis Qasymbek tanystyrǵan «2006 jylǵy 20 naýryzdaǵy Qazaqstan Respýblıkasynyń Úkimeti men О́zbekstan Respýblıkasynyń Úkimeti arasyndaǵy Halyqaralyq avtomobıl qatynasy týraly kelisimge ózgerister men tolyqtyrýlar engizý týraly hattamany ratıfıkasııalaý týraly» zań jobasy eki el arasyndaǵy jolaýshylar tasymalyn júzege asyrýǵa quqyq beredi jáne osy saladaǵy qyzmetti retteıdi.
Mınıstrdiń aıtýynsha, bul qujat avtomobıl kóligimen jolaýshylar tasymalyn qamtamasyz etýge negizdelgenimen, onyń astarynda qos memleket arasyndaǵy saýda-ekonomıkalyq áriptestikti tereńdetý men belsendi qarym-qatynasty jandandyrý múddesi jatqandyǵy belgili.
Depýtattardyń biraýyzdan maquldaýyna ıe bolǵan bul qujatta eki el arasynda aldaǵy ýaqytta jolǵa shyǵatyn avtobýs qatynastarynyń baǵyttary men onyń qyzmetin bir izge túsiredi. Osy maqsatta Qazaqstan men О́zbekstan Respýblıkasy atynan áreket etetin salalyq mamandandyrylǵan komıssııa qurylǵan jáne ol jylyna eki ret otyrys ótkizý arqyly qyzmet barysynda týyndaıtyn máselelerdiń túıinin tarqatyp otyrýǵa mindetteledi.
Sondaı-aq, Jeńis Mahmudulynyń túsindirýinshe qyzmet kórsetetin kompanııalar sany árbir memleketten onnan kem bolmaýy múmkin ári olarǵa 5 jyldyq kelisimshart usynylady dep josparlanǵan.
Osy oraıda bir eskerte keterlik jaıt, mamandardyń aıtýynsha, qos memleket arasyndaǵy ótken jylǵy jolaýshylar aǵyny 8 mıllıon adamnyń shamasyn quraǵan bolsa, avtomobıl qatynasy oıdaǵydaı iske qosylǵannan keıingi kórsetkish 12 mıllıonǵa jetýi múmkin eken.
Depýtattar talqysynan ótip, maquldanǵan kelesi qujat – «Qazaqstan Respýblıkasy Úkimeti men Norvegııa Koroldiginiń Úkimeti arasyndaǵy Halyqaralyq avtomobıl tasymaldary týraly kelisimdi ratıfıkasııalaý týraly» zań jobasy boldy.
Zań jobasynyń negizgi maqsaty Qazaqstan men Norvegııa Koroldigi arasyndaǵy halyqaralyq avtomobıl qatynasy salasyndaǵy yntymaqtastyqty odan ári damytý ári avtomobıl tasymaldaryn júzege asyrýdy jeńildetý bolyp tabylady. Sondyqtan da atalǵan kelisimdi ratıfıkasııalaý eki el arasyndaǵy avtomobıl tasymaldaryn, olardyń aýmaqtary arqyly tranzıtti júzege asyrý jáne Qazaqstan–Norvegııa saýda-ekonomıkalyq yntymaqtastyǵyn odan ári damytý úshin quqyqtyq negiz jasaýǵa múmkindik beredi.
Sondaı-aq, otyrys aıasynda Májilis depýtattary birqatar jańa zań jobalaryn salalyq komıtetterde talqylap, ázirleý úshin oń sheshim qabyldady. Olardyń qatarynda salyq salý máseleleri boıynsha ózgerister engizý týraly jáne Ujymdyq qaýipsizdik týraly shart uıymy sheńberinde qupııa aqparattyń saqtalýyn qamtamasyz etý men Islam Uıymy arasyndaǵy shtab-páter týraly kelisimdi qaraý syndy zań jobalary bar.
Nurlybek DOSYBAI,
«Egemen Qazaqstan»