Aqparat jáne kommýnıkasııalar mınıstri Dáýren Abaev Feısbýktegi paraqshasynda Parlament qaraýyna jiberilgen aqparat jáne kommýnıkasııa salasy boıynsha zań jobasynyń normalaryn túsindirip berdi.
«Bul beınejazbada men bıylǵy jazda Parlament qaraýyna usynylǵan aqparat jáne kommýnıkasııa salasyndaǵy zań jobasynyń birqatar normalaryn túsindirdim. Jaqynda qazaqstandyq medıa qaýymdastyqta rezonans týdyrǵan eń daýly normalarǵa qatysty mınıstrliktiń ustanymyn bildiretin jańa beınejazbamdy jarııalaımyn», - dedi Dáýren Abaev Feısbýktegi paraqshasynda.
Beınejazbada Dáýren Abaev aqparat jáne kommýnıkasııa salasyndaǵy zań jobasymen BAQ týraly zańǵa ózgerister engizý týraly Parlamentke jasalǵan usynys barlyq qazaqstandyqqa qatysty bolǵan sebepti túsindirip berýdi jón kórgenin aıtady.
«BAQ tanymal adamdar týraly aqparatty ańdıtyny eshkimge qupııa emes. Ol ánshiler, sportshylar, akterler taǵysyn taǵylar. Ondaı aqparattardyń deni negizsiz áńgime men boljamdarǵa súıenip jazylatyny belgili. Ol aqparat otbasyna, jeke ómiri men densaýlyǵyna qatysty bolýy múmkin. Kóp jaǵdaıda durys emes aqparat adamnyń repýtasııasyna áser etedi. Tipti, ol qate aqparat bolǵannyń ózinde ony teriske shyǵarý ońaı bolmaıdy. Eń sońǵy sheshim - sotqa shaǵymdaný. Ol aılap júıkeńdi juqartatyn jumys. Jáne barlyǵy da sotqa shaǵymdanyp quqyǵyn qorǵaýǵa belsendi emes, onyń ishinde jelsózdiń qurbany bolǵan qarapaıym adamdar. Máselen, «14 jasta otbasyn» qurǵan mańǵystaýlyqtar týraly aqparat. Keıin olardyń kámelet jasqa tolǵandary anyqtaldy. BAQ teris aqparatty jarııalap qana qoımaı, jas jubaılardyń sýretterinde jarııa etti. Osydan keıin elimizdiń barlyq aımaǵynan jas jubaılarǵa syn taqqan, aıyptaǵan, tipti qorlaǵan pikirler aıtyldy. Jel sózdiń jeteginde ketken BAQ jas jubaılardyń ómirin qıyndatty. Endi azamattyń talaby boıynsha BAQ jazylǵan aqparaty úshin dálel keltirýi qajet. Eger ondaı dáleli bolmasa, teriske shyǵarǵanyn jarııalaıdy. Bul túzetý BAQ aqparatty jarııalamas buryn taǵy bir tekserý qajettigin qosymsha mindetteıdi», - dedi Dáýren Abaev.