Astana qalasynyń «Dáýlet» sport kesheninde Qazaqstan Respýblıkasy Ulttyq ulany Bas qolbasshysynyń Kýbogy úshin jekpe-jek urystan halyqaralyq týrnıri bastaldy.
Halyqaralyq deńgeıde uıymdastyrylǵan sharanyń ashylý saltanatyna Ishki ister mınıstri, polısııa general-polkovnıgi Qalmuhanbet Qasymov pen Ulttyq ulan Bas qolbasshysy general-leıtenant Rýslan Jaqsylyqov jáne ofıserler men sarbazdar, ózara qarym-qatynas organdarynyń basshylary, qoǵamdyq uıymdar men áskerı-patrıottyq uıymdardyń ókilderi, mektep oqýshylary qatysty.
Quttyqtaý sóz sóılegen Ishki ister mınıstri Q.Qasymov sportshylarǵa sáttilik tiledi.
«Jekpe-jek urysty áskerdiń qoldanbaly sport túri retinde keń nasıhattap, áskerıler arasynda sport pen salamatty ómir saltyn qalyptastyrý maqsatynda Ulttyq ulan Bas qolbasshysynyń Kýbogine arnalǵan týrnırdi ótkizý ıgi dástúrge aınaldy. Elbasymyz Nursultan Nazarbaevtyń «Qazaqstan 2050» strategııasynda dene shynyqtyrý men sport únemi memlekettiń erekshe qamqorlyǵynda bolatyndyǵyn naqty kórsetken. Ol úshin Memleket basshysy men Úkimet tarapynan jiti kóńil bólinetini aıtylǵan», dedi vedomstvo basshysy.
Shara aıasynda Qalmuhambet Nurmumhambetuly saltanatty sharaǵa arnaıy qonaq retinde kelgen «Rıo-2016» jazǵy Olımpıada oıyndarynyń jeńimpazy, boksshy Danııar Eleýsinovty ortaǵa shaqyryp, ishki ister organdary qyzmetkerleri arasynda buqaralyq sportty damytýǵa qosqan úlesi úshin «Ishki ister organdarynyń qurylǵanyna – 25 jyl» mereıtoılyq keýde belgisimen marapattady.
Aıta keteıik, Ulttyq ulan Bas qolbasshysy Kýbogine arnalǵan jekpe-jek jarysy jyl saıyn uıymdastyrylyp keledi. Bıylǵy sharaǵa elimizdiń kúsh qurylymdaryndaǵy sport komandalarynan bólek Reseı Federasııasy Ulttyq gvardııasynyń áskerleri men Qytaı Halyq Respýblıkasy Halyqtyq qarýly polısııasy jáne Qyrǵyzstan Respýblıkasy Ulttyq ulanynyń sport komandalary qatysýda. Eki kúnge sozylatyn týrnır aıasynda 150-ge tarta sportshydan quralǵan 15 komanda baq synaıtyn bolady.
Nurlybek DOSYBAI,
«Egemen Qazaqstan»