Bul kúnderi Erevanda qazaq kınosynyń aptalyǵy ótýde. Aptalyq Ermek Tursynov túsirgen «Shal» fılmimen ashyldy. Fılmdi armıan kórermenderine bas keıipker Erbolat Toǵyzaqov tanystyrdy – dep habarlaıdy «Qazaqfılm» kınostýdııasynyń baspasóz qyzmeti.
Bıyl Qazaqstan men Armenııa arasyndaǵy dıplomatııalyq qarym-qatynastarǵa 25 jyl toldy. Qazaq kınosynyń aptalyǵy osynaý ataýly is-sharaǵa oraı uıymdastyrylǵan. Jergilikti halyq bizdiń rejısserler túsirgen basqa da fılmderdi «Máskeý» kınoteatrynan tamashalap úlgerdi. Aıtalyq, rejısser Rústem Ábdirashtiń «Stalınge syılyq» jáne «Balalyq shaǵymnyń aspany» atty fılmderin qyrkúıektiń 19-y, 20-sy kúnderi kórgen bolsa, rejısserler Sergeı Bodrov, Talǵat Temenov jáne Ivan Passerdiń «Kóshpendiler» fılmin búgin keshte tamashalaıdy. Al erteń Eldar Ýrazbaevtyń «Transsibir ekspresi» kórkem fılmimen aptalyq óz máresine jetpek.
Aıta keteıik, atalǵan is-shara arqyly kınematografııa salasyndaǵy eki el arasyndaǵy qarym-qatynastardy nyǵaıtý, sondaı-aq armıan kórermenderin qazirgi qazaq kınosymen tanystyrý maqsat etilgen. Qazaq kınosynyń aptalyǵyna Armenııanyń zııaly qaýym ókilderi, Kınematografıster odaǵynyń músheleri, Mádenıet mınıstrligi, basqa da memlekettik uıymdar men vedomstvolyq uıymdardyń, dıplomatııalyq korpýstyń ókilderi qatysýda.
«Egemen-aqparat»