Batys Qazaqstan oblysy Qaztalov aýdanyna qarasty Bostandyq aýylynda turatyn Ediljan Qosbolov pen Merjan Serikov Qaraózen men Saryózen arasyn (47 shaqyrym) 4 saǵat ishinde júgirip ótip, aýyldastarynyń qoshemetine bólendi.
Ediljan men Merjan – synyptas dostar, Bostandyq orta mektebinde birge oqyp, bastaýysh klastan-aq boks úıirmesine, fýtbolǵa qatysqan. Ediljan 9 synyptan keıin Oral qalasynda J.Dosmuhameduly atyndaǵy pedagogıkalyq kolledjiniń deneshynyqtyrý fakýltetinde oqydy. Júgirýmen de kásibı túrde aınalysa bastaǵany sol kez. Merjan Qurmanǵazy atyndaǵy saz kolledjiniń akterlik sheberlik fakýltetin támamdasa da sporttan qol úzbegen.
- Jigitter tańǵy saǵat 6-da Jalpaqtal aýylynyń tusynan jolǵa tústi. Sóıtip, tórt saǵat boıy bir yrǵaqpen júgirip otyryp, dál tańerteńgi 10-da Bostandyq aýylyna kelip jetti. Biz marafonshylardyń aldynan oqýshylardy jıyp, sán-saltanatpen kútip aldyq, - deıdi aýyldaǵy orta mektepte tarıh páninen sabaq beretin Nurbek Maqsotov.
Bir súısinerligi, Bostandyq aýylynda buqaralyq sport jaqsy damyǵan. Oǵan orta mektep dırektorynyń tárbıe isi jónindegi orynbasary bolǵan Nurbek Maqsotovtyń úlken úlesi bar eken. Bes jyl buryn aýylda fýtbol úıirmesi ashylǵan, bıyl qyzdardy da qabyldaı bastapty. «Bostandyq bıatlony» da Nurbek uıymdastyrǵan myqty saıystyń biri boldy. Jeńistiń 70 jyldyǵyna «9 mamyrǵa – 9 shaqyrym» atty jarys ótkizip, onyń júldesine arnaıy kúmis júzik jasatypty.
- Kúmisin ózimiz taýyp, sheberge 20 myń teńge berip jasattyq ol júzikti. Sol báıgeden Ediljan ozyp keldi. Merjan da myqty. О́ziniń týǵan kúninde aýdan ortalyǵynan - 30 shaqyrym jerden jaıaý júgirip keldi ǵoı. О́zderine motıvasııa berip, únemi alǵa umtylyp júredi, - deıdi Nurbek shákirtterine súısinip.
Aıtpaqshy, «deneshynyqtyrý pániniń muǵalimi» dıplomy bolsa da Ediljanǵa aýyl mektebinde jumys joq. Jeke kóligimen qalaǵa adam tasyp, kúnin kórip júr. Akterlyq mamandyǵyn ıgergen Merjan Oralda jastar teatrynda birer aı jalaqysyz qyzmet etip, aqyry tastap ketipti. Qazir bos. Ara-tura vagon túsiredi eken. Alaıda sporttan qol úzbeı, uzaq qashyqtyqqa júgirýge mashyqtanyp júr. «Keler jyly Oraldan Bostandyqqa deıin júgirip barsaq» deıdi jelaıaq jigitter. Al ol degenińiz – 340 shaqyrymdyq jol.
Qazbek QUTTYMURATULY, «Egemen Qazaqstan»