Quramyna úzdik otandyq kıno jáne televızııa qyzmetkerleri men kıno óneriniń damýyna, tanylýyna úles qosqan sheteldik kınematografıster kiretin «Ulttyq kınematografııalyq óner jáne ǵylym akademııasy» qoǵamdyq birlestigi taǵaıyndaǵan ulttyq «Tulpar» kınojúldesin tabystaý rásimi bıyl ekinshi ret ótkizildi.
Munda otandyq kartınalar 8 atalym boıynsha, al túrkitildes elder jáne kórshiles memleketterden qatysqan fılmder bir atalymda baq synady.
Bıylǵy «Tulpardan» úmitkerlerdiń ishinde Nurtas Adambaıdyń «Taraz», Katerına Sývorovanyń «Erteń teńiz», Gaýhar Nurtastyń «Toqal», Svetlana Fortýnanyń «A.L.J.I.R» fılmderi de bolǵan edi. Ádettegideı, kıno merekelerinde qyzyl kilemniń ústimen qýanysh qushaǵynda júrip ótetin rejısser Aqan Sataevtyń jeńisti joly bul keshte de jalǵasyn taýyp, ol túsirgen «Aýdandardyń» tóbesinen júlde jaýǵan kún boldy.
Sonymen «Úzdik fılm» de, «Úzdik rejısserlik jumys» ta, «Úzdik ssenarıı» de, «Fılmge jazylǵan úzdik mýzyka» da, «Úzdik er adam» da rejısser Aqan Sataevtyń «Aýdandarynda» bolyp shyqty. Tımýr Jaqsylyqov úzdik ssenarııdiń ıesi atansa, úzdik kompozıtor Álim Zaırov pen úzdik akter Elteris Nurjanov osy «Aýdandardyń» ishinen tabyldy. A.Sataevtyń fılminen keıin eń kóp júldeni ıelengen fılm «Qazaq handyǵy. Almas qylysh» boldy. «Almas qylyshta» jarqyldaǵan Qaırat Kemalov ta Elterispen birge «Úzdik er adamnyń rólin» bólisti. Bul tarıhı týyndydaǵy Sapar Koıchýmanov, Aleksandr Plotnıkov «Úzdik operatorlyq jumys», Sábıt Qurmanbekov pen О́mirzaq Shmanov «Úzdik qoıýshy-sýretshi jumysy» úshin marapattaldy. «Ǵalamtorda» oınaǵan Aısulý Ázimbaeva «Úzdik áıel rólin» jeńip aldy. Asanáli Áshimovke «Qazaqstan kınematografııasyna qosqan úlesi úshin» júldesi tabystaldy.
Aıgúl AHANBAIQYZY, «Egemen Qazaqstan» ALMATY