Cemeı qalasynyń 299 jyldyq mereıtoıy kún raıynyń sýyqtyǵyna qaramastan erekshe atalyp ótildi. Qalanyń ár aýdanynda merekelik konsertter, saýda-sattyq, qolóner týyndylarynyń kórmeleri, sporttyq sharalar uıymdastyryldy.
Ortalyq saıabaqta qala ákimi Ermak Sálimov zaýyttar men kásiporyndarda jumys isteıtin eńbekqor otbasylarǵa syı-syıapat tapsyrdy. Máselen, Nurahmetovter otbasy «Semeı ınjınırıng» AQ-ynda 52 jyl boıy jumys isteıdim eken. Tipti olardyń nemereleri osy kásipti atadan balaǵa mura etip alǵan. Al orys ultynyń ókilderi, Slýhaı otbasy «Qazpolıgraf» JShS-inde jumys istegendikterine 97 jyl bolypty. Osylaısha qaladaǵy Ortalyq saıabaqta qala kúnin atap ótý sharasy kún sýyqtyǵyna qaramastan qyzyp jatty. Biraq ta, osynda ashyq kınoteatr ashylady dep kútilgenmen bul aýa-raıynyń qolaısyzdyǵyna oraı biraz keıinge shegerildi. О́ıtkeni qar jaýyp ketti. Al qalalyq Mádenıet úıinde Alashtyń 100 jyldyǵyna arnalǵan «Alaman aıtys» ótti. Qalalyq «Arbat» kóshesinde sýretshiler men músinshiler qala kóshelerin beınelegen jeke týyndylaryn halyq nazaryna usyndy.
Arbatqa jalǵas qalanyń 72 kvartal aýdany oń jaǵalaýdyń Ortalyq bóligine jatady. Mundaǵy «Revolıýsıonerler alańynda» qaladaǵy aıtýly №3 mekteptiń ujymy kórme uıymdastyryp, qala turǵyndaryn qolóner týyndylarymen erekshe tánti etti.
-Bizdiń mektep ornalasqan 72 kvartal aýmaǵy únemi jańalyqtardyń jarshysy, nebir qyzyqty sharalardyń ordasy deýge bolady,-dedi mektep dırektorynyń tárbıe isi jónindegi orynbasary Álııa Meıramǵalıqyzy,-bizdiń janymyzdan mine, Álıhan Bókeıhanovtyń eskertkishi ashyldy. Alashorda úkimetiniń 100 jyldyǵyn atap ótýdemiz. Soǵan oraı, mektep ujymy bir aýyzdan basshymyz Nurjan Ahmetqalıevtiń bastamasymen Semeı qalasynyń 299 jyldyq mereıtoıyna erekshe atsalysýdy jón kórdik. Qarap otyrsańyzdar Astana qalasyndaǵy Báıterek, Úkimet úıi, alash arystary Álıhan Bókeıhanov, Ahmet Baıtursynov, Júsipbek Aımaýytov, Maǵjan Jumabaevtardyń fotosýretterin de halyq nazaryna usynyp otyrmyz.
-Biz búgin qala kúnin atap ótýdemiz, bul qalanyń taǵdyry tarıhqa toly,-dedi qaladaǵy qadirmendi ári úlgili ustazdardyń biri Baıan Nurǵalıeva,-álemge Abaıdaı uly adamdy syılaǵan, osy topyraqta Shákárim men Muhtar danalar ómirge kelgen. Men óz oqýshylaryma bizdiń Semeıde Abaıdyń dosy Evgenıı Mıhaelıs, Shoqan Ýálıhanovtyń joldasy Fedor Dostoevskııler de ómir súrip, osy qalada ózderiniń nebir tamasha týyndylaryn jazǵandyqtaryn únemi aıtyp otyramyn. Semeı qalasy órkenıettiń, ozyq mádenıettiń qalasy. Qala kúni qutty bolsyn demekpin!
Ertis jaǵalaýynda aq halatty abzal jandar, dárigerler de án salyp, bı bılep óz ónerlerin ortaǵa saldy. Osynda ákelingen «Iýnıs» shulyq-náskı fabrıkasynyń ónimderin qala jurtshylyǵy jappaı satyp aldy. Al «SemAZ» JShS-iniń traktorlary men Sılıkat zaýytynyń túrli-tústi kirpishteri de kelýshilerdiń kózaıymyna aınaldy.Bizdiń qalamyzda da osyndaı irgeli óndiris oryndary ulǵaıyp, jandanyp kele jatqandyǵynyń kórsetkishindeı boldy. Halyq osy óndiris ónimderindegi «Made in Semey» degen jazýdy kórip, rızashylyqtaryn jetkizdi. Al saıajaı turǵyndary da merekeden qalys qalmady. «Shyǵys» saıajaıynyń turǵyny Nurbol Aıshýaqov merekege 15 kılogramdyq asqabaq ákelipti. Keshke qaraı konserttik baǵdarlama uıymdastyryldy. Qala kúni tún ortasyna deıin merekelendi.
Raýshan Nuǵmanbekova, sýretter avtordyki
Semeı qalasy.