Memlekettik hatshy Gúlshara Ábdiqalyqovanyń tóraǵalyǵymen QR Prezıdenti janyndaǵy Áıelder isteri jáne otbasylyq demografııalyq saıasat ulttyq komıssııanyń otyrysy ótti.
Jıyndy ashqan Memlekettik hatshy Qazaqstannyń úshinshi jańǵyrýdy iske asyrýǵa kirisip ketkenin atap ótti. Búgingi tańda elimizdiń barlyq aımaqtarynda Elbasy belgilep bergen negizgi úsh salany – ekonomıkany, saıasatty jáne qoǵamdyq sanany jańǵyrtý boıynsha alǵa qoıylǵan mindetterdi júzege asyrý bastalyp ketti.
«Elbasy N.Nazarbaev ekonomıkalyq, saıası jáne rýhanı jańǵyrý baǵyttarynda reformalardy bastap berdi. Sonymen qatar, «EKSPO-2017» halyqaralyq kórmesi ótti. Osy sharanyń aıasynda «Áıelder bolashaq energııany qoldaıdy» atty álemdik forým bolǵany ózderińizge málim», – degen G.Ábdiqalyqova komıssııa músheleriniń sharany ótkizý barysynda atqarǵan jumysyna toqtaldy.
Memlekettik hatshy rýhanı jańǵyrýdyń ozyq úrdisterin iske asyrýdyń mańyzdylyǵyna toqtaldy. Onyń aıtýynsha, azamattardyń boıynda rýhanı qundylyqtardy, básekege qabilettilikti, pragmatızmdi qalyptastyrý, ulttyq erekshelikti saqtaý, bilimge qushtarlyqty artyrý isinde otbasynyń, ásirese, óskeleń urpaqty tárbıelep otyrǵan áıelderdiń basty ról atqaratyny sózsiz.
Otyrys barysynda G.Ábdiqalyqova elimizdegi áıelder qaýymyn Memleket basshysynyń «Bolashaqqa baǵdar: rýhanı jańǵyrý» atty maqalasynda kórsetilgen 6-shy baǵytty ilgeriletý úshin barynsha kúsh jumyldyrýǵa shaqyrdy.
Sonymen qatar, jıynda Qazaqstannyń BUU-nyń 2030 jylǵa deıingi Ornyqty damý maqsattaryna qol jetkizý baǵytynda atqarylǵan jumystar jóninde Syrtqy ister mınıstrliginiń baıandamasy tyńdaldy. Mınıstrdiń orynbasary Erjan Ashyqbaevtyń aıtýynsha, elimizde kez kelgen saladaǵy áıelderdiń úlesin 40 paıyzǵa jetkizý kózdelgen.
«2015 jyly BUU-nyń bas assambleıasy kezinde uıymǵa múshe elderdiń bári 17 ornyqty damý maqsatyn bekitken bolatyn. Sonyń biri genderlik saıasatqa qatysty. Mejeniń basty maqsaty qoǵamnyń jartysyn quraıtyn áıelder qaýymynyń múmkinshilikterin paıdalana otyryp, tepe-teńdik saqtaýǵa kóńil bólý», – dedi E.Ashyqbaev.
Jıynda memlekettik qyzmetti jańǵyrtý jáne mansap turǵysynan ilgerileý barysynda teń múmkindikterdi qamtamasyz etý jónindegi másele qaraldy. Memlekettik qyzmet isteri jáne sybaılas jemqorlyqqa qarsy is-qımyl agenttiginiń aqparatyna sáıkes, 2017 jylǵy 1 qańtardaǵy jaǵdaı boıynsha elimizdegi memlekettik qyzmetkerlerdiń arasynda áıelderdiń úlesi – 55,5 paıyzdy qurap otyr. Bul – byltyrǵy kórsetkishke qaraǵanda 0,5 paıyzǵa joǵary.
«Bıylǵy qańtardan bastap 2030 jylǵa deıingi otbasylyq jáne genderlik saıasat tujyrymdamasyn iske asyrý bastalyp ketti. Soǵan sáıkes, búgingi komıssııa otyrysynda memlekettik qyzmet deńgeıinde áıel jumysshylardyń paıyzdyq mólsherin arttyrý máselesi qaraldy. Basty baǵyttardyń biri – mansaptyq turǵydan kóterilýge múmkindik berý», – dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń apparat basshysy Saıan Ahmetjanov.
Apparat basshysynyń derekterine súıensek, 2016 jyly «B» korpýsyndaǵy ákimshilik laýazymdardy ıelenýge arnalǵan konkýrstarǵa qatysqan áıelderdiń mólsheri 48 paıyzdy quraǵan. Jumysqa alyný boıynsha da názik jandylardyń ara salmaǵy 48,5%-ǵa jetipti. Byltyr basshylyq qyzmetke taǵaıyndalǵan áıelderdiń úlesi 34,8 paıyzǵa jetip jyǵylǵan. S. Ahmetjanov 2030 jylǵa deıin basshylyq qyzmet atqaratyn áıelderdiń ara salmaǵyn 30 paıyzǵa deıin kóbeıtý josparlanǵanyn aıtady.
«Byltyr memlekettik qyzmetkerler arasynda attestasııadan ótý júrgizildi. Sonda názik jandy azamattardyń quqyqtaryn qorǵaý maqsatynda balaly, aıaǵy aýyr bolýyn jáne otbasylyq jaǵdaıyna qarap keıbir áıelderdi eńbek quqyqtaryna sáıkes attestasııadan bosatyldy», –degen S.Ahmetjanov keleshekte áıelderdiń otbasyna kóńil bólýine múmkinshilik berý máselesi josparlanyp otyrǵanyn aıtady.
Budan bólek, otyrysta ómirde kúrdeli jaǵdaılarǵa tap kelgen tulǵalarǵa qoldaý kórsetý jónindegi «Otbasy ortalyǵy» qoǵamdyq qorynyń jumys tájirıbesi tanystyryldy.
Shyǵys Qazaqstan oblysy ákiminiń orynbasary Ásem Núsipovanyń sózine súıensek, aımaqta genderlik saıasat máselesi tıimdi jolǵa qoıylǵan.
«Oblysta azamattyq qoǵam men memlekettik mekemelerdiń ózara baılanysy aıasynda genderlik saıasat, áleýmettik qorǵaý deńgeıi tómen turǵyndarǵa kómek kórsetý, jastardy qoldaý jáne salaýatty ómir saltyn qalyptastyrý maqsatynda úkimettik emes uıymdarmen belsene jumys istep keledi. Byltyr ÚEU-larmen 375 mıllıon teńge kólemindegi qarjyǵa joba júrgizsek, bıyl 400 mıllıon teńge qarajat ıgerildi», – dedi Á.Núsipova.
Memlekettik hatshy jıyn qorytyndysy boıynsha memlekettik mekemelerge birqatar naqty tapsyrmalar berdi.
Aıta ketý kerek, Genderlik saıasat «Erler men áıelderdiń teń quqyqtarynyń jáne teń múmkindikteriniń memlekettik kepildikteri týraly» jáne «Turmystyq zorlyq-zombylyq profılaktıkasy týraly» zańdarmen retteledi. Byltyr Qazaqstan Respýblıkasynda 2006-2016 jyldarǵa arnalǵan Genderlik teńdik strategııasy sátti iske asyrylyp, Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasy bekitildi.
Abaı ASANKELDIULY,
«Egemen Qazaqstan»