Keshe Májiliste «Nur Otan» partııasy fraksııasynyń janyndaǵy komıssııanyń kezekti otyrysy ótti. Depýtattardyń óńirlerdegi jazǵy jumystarynyń qorytyndysy boıynsha ınfraqurylymdy damytýdyń 2015-2019 jyldarǵa arnalǵan «Nurly jol» memlekettik baǵdarlamasyn iske asyrý barysy egjeı-tegjeıli talqylanǵan otyrysta negizgi baıandamany Investısııalar jáne damý vıse-mınıstri Roman Sklıar men «Báıterek» Ulttyq basqarýshy holdınginiń ókilderi jasady.
Negizinen, partııa fraksııasynyń janyndaǵy komıssııanyń mindeti – «Turǵyn úı-kommýnaldyq sharýashylyq ınfraqurylymyn, sýmen jáne jylýmen jabdyqtaý jelilerin jańǵyrtý, turǵyn úı ınfraqurylymyn nyǵaıtý» baǵyty boıynsha «Nurly jol» ınfraqurylymdy damytýdyń 2015-2019 jyldarǵa arnalǵan memlekettik baǵdarlamasyn iske asyrýǵa Qazaqstan Respýblıkasynyń Ulttyq qorynan bólinetin qarajattyń jáne bıýdjettik qarajattyń maqsatty jáne tıimdi jumsalýyna baqylaý júrgizý. Atalǵan másele osy sebepti depýtattar talqysyna shyǵarylǵan bolatyn.
Memlekettik «Nurly jol» baǵdarlamasy aıasynda elimizdegi turǵyn úı ınfraqurylymdary júıesin, atap aıtqanda, jylý men sý jáne káriz qubyrlaryn qaıta jańǵyrtýdan ótkizýge arnaıy maqsatta qarjylandyrý qarastyrylǵan. Al bul saladaǵy jumystar naqtylanǵan eki baǵyt boıynsha júzege asyrylýda. Onyń alǵashqysy – jylý men sý jáne káriz qubyrlaryn jańǵyrtý.
Investısııalar jáne damý mınıstrligi usynǵan málimetterge kóz júgirtsek, búginde jumys jospary bıýdjettik nesıelendirý jáne sýbsıdııalaý ádisi arqyly oryndalýda. Osy maqsatta 2015-2017 jyldar aralyǵynda ıgerilýi tıis dep bólingen qarajat kólemi 203 mlrd teńgeni quraıdy. Nátıjesinde, 332 joba aıasynda 3 208 shaqyrym jylý, sý men káriz qubyry jelisi jáne 34 qazandyq pen 16 birlik sharýashylyq nysandary kúrdeli jóndeýden ótkizilýi tıis. Sondaı-aq ekijyldyq baǵdarlama arqyly 1 848 shaqyrym qubyr jelileri jańadan tóselip, sý jańa 21 qazandyq pen 12 sý sorý stansasy iske qosylady dep josparlanǵan.
«Osynyń ishinde bıýdjettik nesıelendirý ádisimen baǵdarlama aıasynda 2015 jyly 60 mlrd teńge, 2016 jyly 86,9 mlrd teńge ıgerilip, 211 joba júzege asyrylyp, 1983,7 shaqyrym ınfraqurylymdyq jeliler jóndeýden ótkizildi. Al endi búgingi tańda tabıǵı monopolııa nysandaryna bólingen qarajat kólemi 75,4 mlrd teńgeni quraıdy, bul jalpy kórsetkishtiń 87 paıyzyna teń. Endi jyl sońyna deıin qalǵan 11,5 mlrd teńge (13 paıyz) tolyq ıgeriledi dep kózdep otyrmyz. Jalpy, bıyldyqqa 103 ınvestısııalyq jobaǵa bólingen 48 mlrd teńge keri qaıtaryp alyndy. Osynyń esebinen aldaǵy ýaqytta 1 200 shaqyrym qubyr jelisin jańartýdy josparlaýdamyz», dedi R.Sklıar.
Al endi bıýdjettik qarjy esebinen sýbsıdııalaý ádisine keler bolsaq, bul jerde jobalardyń jalpy qunynyń 50 paıyzyna deıingi bóligi ǵana memleket tarapynan qarjylandyrylyp, odan ózgesi halyqaralyq qarjy uıymdarynyń ınvestısııasy esebinen júzege asyrylady.
Osy oraıda aıryqsha atap óterlik jaıt, joba aıasynda óńirlerdegi turǵyn úı sharýashylyǵynyń damýyna den qoıylatyndyǵy bolsa kerek. Bıylǵy segiz aıdyń ishinde respýblıka boıynsha 6,9 mln sharshy metr turǵyn úıge jóndeý jumystary júrgizilgen. Bul ótken jylǵy kórsetkishpen salystyrǵanda 8,4 paıyzǵa kóp. Al turǵyn úı qurylysyna tartylǵan ınvestısııa kólemi 507,8 mlrd teńgeni quraǵan. Sóıtip salaǵa qatysty jalpy jyldyq jospardyń oryndalý kórsetkishi 68 paıyz bolyp otyr. Bul jerde mejelengen kórsetkishte 10,1 mln sharshy metr baspana salý kózdelgen kórinedi. Mamandar pikirinshe, búgingideı qarqyn alǵan jumys yrǵaǵyna qarap jospar oryndalmaı qalady-aý dep alańdaýǵa negiz joq.
Nurlybek DOSYBAI, «Egemen Qazaqstan»