Aıagóz qalasynda «Jumyspen qamtýdyń jol kartasy-2020» baǵdarlamasy aıasynda jas otbasylarǵa arnap salynǵan 50 páterlik jataqhana paıdalanýǵa berildi.
Olardyń kópten kútken qýanyshtaryna oblys ákimi Danıal Ahmetovtiń ózi ortaqtasyp, baspana kiltin saltanatty túrde tabys etti. «Bul páterde qaryndasym ekeýimiz turamyz. О́zim balalar úıinen túlep ushqanymmen, jumysty da sol jerden tapqanmyn. Ata-ananyń qamqorlyǵynan aıyrylǵan jandarǵa memlekettiń osyndaı qoldaý kórsetip jatqanyna rızamyz», - deıdi «óz úıi – óleń tósegine» qol jetkizgen jastardyń biri Jandos Seıitqazın.
Jastar úshin salynǵan bul jataqhananyń Aıagóz qalasynda 1993 jyldan beri alǵash ret boı kótergen turǵyn úı ekenin aıta keteıik. Baspanaly bolǵan jas jubaılar bes jyl boıy osynda turyp, tek kommýnaldyq tólemderdi ǵana óteıdi. Osy aralyqta «Turǵynúıqurylys jınaq bankine» salym jınap, ıpoteka rásimdeýi tıis.
Aıagóz aýdanynda jasaǵan jumys sapary barysynda aımaq basshysy óńirdiń bilim salasy úshin mańyzy zor jaǵymdy jańalyqty jetkizdi. Kelesi jyldan bastap Shyǵys Qazaqstanda «Týǵan mektep» atty baǵdarlama qolǵa alynyp, oblystaǵy 297 bilim ordasynyń materıaldyq bazasy Nazarbaev zııatkerlik mektebiniń deńgeıimen teńestirilmek. Sonymen qatar osy baǵdarlama aıasynda 190 robot tehnıkasy synyby ashylatyn bolady.
Azamat Qasym,
«Egemen Qazaqstan»
Shyǵys Qazaqstan oblysy, Aıagóz aýdany
Sýretti túsirgen – Mánap MURZATAEV