Qorshaǵan ortany kútip baptaý jalpyǵa ortaq mindet. Tabıǵat anany aıalaýda 2005 jyldan bastap jumysyn bastaǵan «Jasyl el» stýdentter jasaǵynyń orny bir tóbe. Almatyda jasyl eldiń XIII maýsymy máresine jetip, jas eńbekshiler jasyl elmen jazǵa deıin qoshtasty.
Osyǵan oraı, qaladaǵy «Femılı» demalys parkinde jas eńbekshilerdi marapattaý rásimi ótti. Atalǵan shara Respýblıkalyq «Belsendi jastardy qoldaý» uıymy men Almaty qalasy ákimdiginiń Jastar Saıasaty basqarmasynyń qoldaýymen júzege asyp otyr. Marapattaý rásiminde eńbekte tabandylyq tanytyp kózge túsken stýdentter men jumys barysynda birneshe nomınasııa boıynsha dara shyqqan shákirtter marapattaldy.
– Jastardy jumysqa tarta otyryp, olardyń boıyndaǵy eńbekke degen yntasyn oıatýǵa tyrysamyz. Olardyń jaqsy azamat bolyp qalyptasýyna bul jobanyń tıgizer septigi mol. Jaz aılarynda ýaqyttaryn bosqa ótkizbeı qarajattaryn taýyp ata-anaǵa qolǵabys bolsa, ekinshi jaǵynan qorshaǵan ortanyń tazalyǵyna óz úlesterin qosady. Qala aýmaǵyndaǵy demalys oryndary men shatqaldardyń tazalyǵyn qamtýda «Jasyl el» jasaǵynyń atqarǵan jumysy aýqymdy, – deıdi joba úılestirýshisi Juldyz Apeshova.
Elbasy ıdeıasynan bastaý alǵan baǵdarlama birneshe jyl kóleminde óz jemisin berip keledi. Oǵan dálel ótken jyldyń ózinde «Jasyl el» jasaǵynyń jas eńbekkerleri el aýmaǵy boıynsha 5 myńnan astam aǵash otyrǵyzyp, 4ga aýmaqty 130 tonna qoqystan tazartqan. Eske salsaq, belsendi jastardan quralǵan «Jasyl el» stýdentter jasaǵy elimizdiń 14 oblysy jáne Almaty men Astana qalalarynda jyl saıyn tabandy eńbek etip keledi. Jasyleldikter tek qana elimizdiń tazalyq saqtaý men kógaldanýyna ǵana emes, oǵan qosa memleketimizdiń órkendeýine jaýapty jańa býyn tárbıelep, jastardy jumyspen qamtýǵa, stýdentterdiń patrıottyq rýhyn kóterýge úlken úles qosýda.
«Arman OKTIаBR,
Egemen Qazaqstan»
ALMATY