Erim deıtin el bolmasa, elim deıtin er qaıdan bolsyn. Bul qaǵıdany Qaztutynýodaǵy Qaraǵandy ekonomıkalyq ýnıversıteti árqashan uran etip keledi. Jaqsymen ótkizgen jarty saǵattyń ózi janǵa shýaq syılaıtynyn rektor Erqara Aımaǵambetov erekshe eskeredi. Taıaýda bilikti basshy ýnıversıtettiń birinshi kýrs stýdentterin ataqty sportshylarmen kezdestirdi. Stýdentter mádenıet saraıynda «Táýelsiz elimniń týyn jelbiretken chempıondar» degen ataýmen ótken konsertke sol «juldyzdy» top qonaqqa keldi.
– Bıylǵy bizdiń magıstranttar qatarynda Dıdar Qamıev, Qamshybek Qonqabaev, Vasılıı Levıt jáne Baqtııar Artaev syndy ataqty azamattar bar. Búgin olar 1-kýrs stýdentterimen kezdesýge keldi. Bizdiń ýnıversıtet jyl saıyn osyndaı merekelik sharalar uıymdastyryp otyrady, deıdi osy oqý arasyndaǵy qoǵammen baılanys boıynsha bas maman Leıla Ivadılınova.
«Juldyzdy» magıstranttardan basqa kezdesýge esimderi elge eleýli tulǵalar keldi. Olardyń keıbiri QEÝ-diń túlegi bolsa, keıbiri áli de ýnıversıtette joǵarǵy bilim alyp jatyr. Qonaqtar qatarynda Olımpıada chempıony, QR Parlament Májilisiniń depýtaty Serik Sápıev, bokstan Ulttyq quramanyń bas bapkeri Myrzaǵalı Aıtjanov, Álem Kýbogynyń kúmis júldegeri, Eýropa chempıony Serik Nurqazov, Olımpıada oıyndarynyń qola júldegeri Serik Eleýov bıznesmen, Erlan Nyǵmatýlın bar. Birinshi kýrs stýdentterimen Azııa chempıonatynyń kúmis júldegeri, álem chempıonatynyń qola júldegeri Abylaıhan Júsipov te kezdesti. Ol osy JOO-nyń 4-shi kýrs stýdenti.
– Bıylǵy jyly men QEÝ-niń magıs-tratýrasyna «kedendik is» mamandyǵy boıynsha tústim. Bul oqý ordasyn bekerden tańdaǵan joqpyn – munda árdaıym sportshylarǵa qoldaý kórsetiletinin bilemin. Birinshi kýrs stýdentterine iri maqsat pen sáttilik tileımin – árkim óz mamandyǵynda úzdik bolsyn, – dedi boks-tan Qazaqstan quramasynyń múshesi, 2017-shi jyly Germanııada ótken boks boıynsha álem chempıonatynyń kúmis júldegeri Qamshybek Qonqabaev.
Esterińizge sala keteıik, QEÝ magıstratýrasyna «kedendik qyzmet» mamandyǵy boıynsha Olımpıada oıyndarynyń ıegeri Vasılıı Levıt tústi. Sonymen qatar, bul joǵarǵy oqý ornynda Olımpıada chempıony Baqtııar Artaev ta oqıtyn bolady. Ol «memlekettik jáne jergilikti basqarý» mamandyǵyn tańdaǵan. Al ataqty aıtysker Dıdar Qamıev «quqyqtaný» boıynsha bilimin jetildiredi.
Olardyń barlyǵy memlekettik bilim grantyn alyp, tegin oqıdy.
Mıras ASAN, «Egemen Qazaqstan»
Qaraǵandy oblysy