S.Muqanov atyndaǵy ámbebap kitaphanada Parlament Májilisi Agrarlyq komıtetiniń kóshpeli otyrysy ótti. Onda jer zańnamasyna qatysty ózekti jaıttar qaralyp, talqylandy.
Májilis depýtattarynyń, Qostanaı, Aqmola, Soltústik Qazaqstan oblystary agroqurylym basshylarynyń, memlekettik organdar jetekshileriniń, qoǵamdyq uıymdar ókilderiniń qatysýymen uıymdastyrylǵan alqaly basqosýdy aımaq basshysy Qumar Aqsaqalov ashyp, kún tártibine usynylǵan máseleniń ózektiligin, aýylsharýashylyq jerleri men qorlaryn tıimdi paıdalanýdyń mańyzdylyǵyn atap ótti.
Agroónerkásip salasynda jumys istep júrgender ozyq tehnologııalardyń artyqshylyqtaryn jaqsy sezinýi kerek. Bul salaǵa Úkimet júıeli qoldaýlar men jeńildikter kórsetip keledi. Jer – basty baılyǵymyz, asyraýshymyz, sondyqtan júktelgen mindetti abyroımen atqarý bárimiz úshin basty paryz sanalýy tıis, dedi Qumar Irgebaıuly. Bıylǵy egin oraǵy uıymshyldyqpen atqarylyp, gektar berekeligi 17 sentnerden aınalýda. Aýylsharýashylyq taýarlaryn óndirýshilerge 44 mlrd teńge sýbsıdııa berilgen. Kelesi jyly maıly daqyldar kólemin 1 mıllıon gektarǵa deıin ulǵaıtý kózdelip otyr.
Aýyl sharýashylyǵy mınıstriniń orynbasary Erlan Nysanbaev Jer reformalary jónindegi komıssııanyń atqarǵan jumystary men Parlament qaraýyna usynylǵan zańnamalyq aktilerge engiziletin ózgerister men tolyqtyrýlar jaıly baıandap berdi.
Budan bylaı aýylsharýashylyq maqsatyndaǵy jerlerdi qorǵaýǵa alý men jalǵa alýshylardyń jaýapkershiligi kúsheıtilip, jer berý, konkýrs ótkizý sharttary qatańdatylady. Utymdy paıdalanylmaıtyn jer telimderin túgendeý, jerdiń tozýyna qarsy yqpaldy jandandyrý, turǵyndardy jaıylymdyq jerlermen qamtamasyz etý máseleleri erekshe baqylaýda bolady, dedi ol.
Parlament Májilisiniń depýtattary Berik Ospanov, Sergeı Zvolskıı jobaǵa 250-deı túzetýler engizilgenin, usynys-tilekterdiń 90 paıyzdaıy eskerilgenin jetkizdi.
Oblys ákiminiń birinshi orynbasary Aıdarbek Saparov qazirgi qoldanylyp júrgen jer zańnamalary aıasynda atqarylyp jatqan is-sharalardy ortaǵa saldy. Aýylsharýashylyq maqsatyndaǵy jerlerdiń 16 paıyzy sharýa jáne fermerlik qojalyqtarǵa, 55 paıyzy seriktestikter men aksıonerlik qoǵamdarǵa tıesili. Alaıda olardyń arasynda jer kútimine salǵyrt qaraıtyndar da joq emes. Sońǵy úsh jylda 1 mıllıon 30 myń gektar jer memleket menshigine qaıtarylǵan. Onyń 383 myń gektary – jyrtylǵan jerler. Bıyl 116 myń gektar jerdiń qorǵaýsyz qalǵany anyqtalǵan. 117 agroqurylym eginshilik mádenıetin jetildirý, aýyspaly egis júıesin qalyptastyrý isimen múldem aınalyspaıdy.
Máselen, «Agrofırma Vınogradovka» JShS gektar basy 5 sentnerden ónim jınaýdy kóp jyl boıy qanaǵat etip kelgen. A.Saparov bir zańdy tulǵaǵa beriletin jer kólemin 50 myń gektardan asyrmaý, quryltaıshynyń sol óńirde turý tıistiligin alǵa tartyp, eki jyl boıy maqsatty negizde paıdalanylmaǵan jerlerdi keri qaıtarý qajettigin, ol úshin Jer kodeksiniń 92-babyna ózgeris engizýdi usyndy.
Qostanaılyqtar men aqmolalyqtardyń jerdi jalǵa berý shartyn birjaqty úzý týraly usynysy qoldaý tapty. О́ıtkeni bul baǵytta oryn alǵan olqylyqtardy joıý tym uzaqqa sozylyp ketip júr. Kóshpeli otyrysta eldi mekender mańaıynda jaıylymdyq jerlerdiń tarlyǵyna, basqa sharýashylyqqa aýysqan adamdardyń tıesili paılaryn alýdyń mashaqatyna baılanysty naqty sheshimder qabyldanatyny aıtyldy.
Depýtattar «Bazıs Qyzyljar», «Peterfeld Agro», «Alekrı» seriktestikterinde bolyp, ozyq tehnologııalarmen, jergilikti tájirıbelermen tanysty.
О́mir ESQALI, «Egemen Qazaqstan»
Soltústik Qazaqstan oblysy