Din isteri jáne azamattyq qoǵam mınıstrligi Din isteri komıtetiniń qoldaýymen «Jastardy rýhanı-adamgershilikke tárbıeleýdegi jáne radıkaldyq dinı ıdeologııaǵa ımmýnıtet qalyptastyrýdaǵy áıelder uıymdarynyń róli» taqyrybynda ǵylymı-praktıkalyq konferensııa ótti.
Alqaly jıynda Din isteri jáne azamattyq qoǵam vıse-mınıstri Berik Aryn ekstremıstik ıdeologııa ókilderi din men dástúrdiń sabaqtastyǵyn, osynyń negizinde qalyptasqan dástúrli rýhanı qundylyqtardy joıýdy kózdeıtinin, sondaı-aq, elimizdiń zaıyrlylyq qaǵıdattaryna degen qoǵamnyń teris kózqarasyn týdyrýdy maqsat etetinin aıtty.
– Qoǵamnyń radıkaldanýyna aqparattyq keńistiktiń ashyqtyǵy men jahandaný prosesteri yqpal etip otyr. Al eń bastysy adamgershilik qundylyqtardyń jutańdyǵynan jastarymyz osyndaı shalys qadamdarǵa baryp jatady. Bizdiń basty mindetimiz – óskeleń urpaq arasynda aqparattyq jumystardyń tıimdiligin arttyrý. Túsindirý jumystary kezinde jat aǵymdardyń maqsaty, olardan keletin qaýip-qater jan-jaqty sóz bolady. Aqparattyq jumystar negizinen aldyn alý jáne deradıkalızasııa baǵytynda júrgizilý ústinde. Al bul maqsatymyzdy tıimdi oryndaýda áıelder uıymdarynyń róli zor, – dedi Berik Aryn.
Ol sondaı-aq, elimizde jetekshi joǵary oqý oryndarynyń janynan qurylǵan «Qyz Jibek» klýbtary jumys istep kele jatqanyn aıtty. Olar búginge deıin qoǵamdy ulttyq dástúr men zaıyrlylyq qundylyqtary negizinde tárbıeleýge septigin tıgizip keledi. Keı oqý oryndarynda «Syrǵalym» degen ataýmen de ashylǵan.
Konferensııada sóz alǵan Din isteri jáne azamattyq qoǵam mınıstrligi Jastar saıasaty departamentiniń dırektory Ǵabıdolla Ospanqulov jastarymyzdyń jat aǵymnyń jeteginde ketpeý úshin elimizdiń túkpir-túkpirinde túsindirme jumystary júrgizilgenin jetkizdi. Onyń barysynda bas-aıaǵy elý myń jasty qamtyǵan myńnan astam is-shara uıymdastyrylǵan.
Al psıhologııa ǵylymdarynyń doktory, professor Láıla Asylbekova din jolyna er adamnan áıelderdiń qatty berilýi qaýiptirek dep esepteıdi. Sebebi, áıel zatynyń radıkaldanýy óte jyldam degen pikirin alǵa tartty.
Dástúrli túrde ótkizilip kele jatqan bul jıyn byltyr «Ekstremızm men terrorızmniń aldyn alýdaǵy áıelder uıymdarynyń róli» degen taqyrypta uıymdastyrylǵan bolatyn.
Aıan ÁBDÝÁLI, «Egemen Qazaqstan»