Qyzylorda oblysynyń ákimdigi men halyqaralyq TÚRKSOI uıymynyń, halyqaralyq Túrki akademııasynyń qoldaýymen "Qorqyt ata murasy: epıkalyq mádenıet, halyq ańyz áńgimeleri jáne áýenderi" taqyrybynda halyqaralyq ǵylymı-teorııalyq konferensııa ótti. Konferensııaǵa otandyq jáne Túrkııa, AQSh, Reseı, Ulybrıtanııa, Qyrǵyzstan, О́zbekstan memleketterinen túrkitanýshy, fılolog, ónertanýshy ǵalymdar men mádenıet qaıratkerleri, ónerpazdar qatysty.
Konferensııany Halyqaralyq Túrki akademııasynyń prezıdenti Darhan Qydyráli júrgizdi.
– Uly ónerimen Uly dalany terbetken, máńgilik ómirdiń joqshysy, kúlli túrki áleminiń ortaq urany – Qorqyt atamyzǵa arnalǵan alqaly jıynnyń Syr elinde ótýi tegin emes. Halyqaralyq deńgeıdegi konferensııa túrki elderiniń ózara mádenı deńgeıin, halyqtyq ónerdi saqtaýdaǵy tájirıbelerin zerdeleýge múmkindik beredi, – dedi moderator óz alǵysózinde.
Konferensııany ashqan oblys ákimi Qyrymbek Kósherbaev kúlli túrkige ortaq Qorqyt ata tynys tapqan mekenge kelgen barsha qonaqtarǵa eldiń yqylasyn jetkizdi. Syr óńiri men Qyzylorda qalasynyń túrkiler men qazaq tarıhyndaǵy mańyzdy ornyna toqtaldy.
– Bul festıval barsha túrkitildes elderdiń basyn qosqan rýhanı kópir ispettes. Elbasynyń bastamalary arqasynda qazir týystas elder arasynda yntymaqtastyq nyǵaıyp, dostyq baılanys ornaǵan. Uly oıshyl Qorqyt babanyń týǵan jerindegi festıval osynyń dáleli,– dedi aımaq basshysy.
Kelesi quttyqtaý sózdi ıelengen halyqaralyq TÚRKSOI uıymynyń bas hatshysy Dúısen Qaseıinov bul konferensııa – ǵylymnyń san salasyndaǵy Qorqyt murasyna qatysty sony zertteýlerdi tanystyratyn jıyn ekenin atap ótti.
– Elbasynyń «Rýhanı jańǵyrý: bolashaqqa baǵdar» maqalasy bizdiń elde ǵana emes, túrki elderi arasynda da erekshe qyzyǵýshylyq týdyryp, iri basqosýlardyń arqaýyna aınaldy. Sebebi álemniń barlyq elderinde rýhanı arqaý kúrdeli jaǵdaıda. Qazirgi zamannyń suarynstary men qaıshylyqtary san qıly ekenin eskersek, ult rýhanııaty úshin asa mańyzdy taqyrypty qozǵaǵan jıynymyzdyń nátıjeli ótetinine senimdimin, –dedi bas hatshy.
Konferensııada Qazaq Ulttyq óner ýnıversıtetiniń rektory, Álem artısi Aıman Musaqojaeva ózi basqaratyn oqý ornyndaǵy dástúrli mýzykanttardy daıyndaýdaǵy jetistikterge toqtaldy. Sonymen birge ýnıversıtet janyndaǵy Qorqyt ata atyndaǵy ǵylymı-zertteý ınstıtýty atqarǵan jumystardy aıtyp ótti.
Konferensııa barysynda tyń oı, tosyn pikir men oryndy usynystar aıtylyp, Qorqyt ata týrasynda keleli baıandamalar jasaldy.
Erjan BAITILES,
«Egemen Qazaqstan».
Qyzylorda oblysy.