Elordanyń «Barys» komandasy Qurlyqtyq hokkeı lıgasynda kezekti kezdesýin 25 qyrkúıekte Sankt-Peterbýrgtiń SKA komandasyna qarsy ótkizip, 1:4 esebimen ese jibergen edi.
Al arada eki kún ótkende Astanadaǵy «Barys Arena» muz saraıynda Iаroslavldiń «Lokomotıv» komandasyn qabyldap, 6:1 esebimen oısyrata jeńdi.
SKA komandasyna qarsy ótken oıynnyń alǵashqy mınýttarynda-aq armııashylardyń shabýylshysy Sergeı Kalının dýbldiń avtory atandy. Matchtyń 58-sekýndynda esepti ashsa, altynshy mınýtta esepti 2:0-ge jetkizdi. Osylaısha, birinshi kezeń qonaqtardyń aıqyn basymdylyǵymen ótti. Bul arada qaqpashy Henrık Karlssonnyń óreskel qatelikter jibergenin aıtpasqa bolmaıdy.
Qonaqtar ekinshi kezeńdi de sátti bastady. Bir oıynshysy kóp bolyp oınaǵan SKA hokkeıshileri match tizginin qolǵa alyp, 23-mınýtta Patrık Herslı qonaqtardyń úshinshi shaıbasyn soqty. Ekinshi kezeń aıaqtalar tusta shabýylshy Aleksandr Barabanov tablodaǵy kórsetkishti 4:0-ge jetkizdi. Bul jerde qorǵaýshylar qatelik jiberip qoıdy.
Úshinshi kezeńniń basynda «Barys» klýbynyń bapkerler quramy shvesııalyq qaqpashy Henrık Karlssonnyń ornyna 22 jastaǵy Sergeı Kýdrıavsevti shyǵardy. Al arada kóp ýaqyt ótpeı komandadaǵy eń jas hokkeıshi, 19 jastaǵy Kırıll Polohov SKA komandasyna soǵylǵan jalǵyz shaıbanyń avtory atandy. Sóıtip Kırıll Polohov Qurlyqtyq hokkeı lıgasyndaǵy óziniń alǵashqy shaıbasyn soqty.
Araǵa eki kún salyp «Barys» «Lokomotıv» hokkeı klýbymen synǵa túsip, tartysty ótken matchta jerlesterimiz 6:1 esebimen aıqyn basymdyqpen jeńdi. Bul oıynda qazaqstandyq shabýylshy Nıkıta Mıhaılıs eki shaıba soǵyp, match qaharmany atandy. «Barys» klýbynan Mıhaılıstan basqa Mett Frettın, (24-mınýt), Roman Savchenko (43-mınýt), Lınden Veı (44-mınýt) jáne komanda kapıtany Naıdjel Doýs (52-mınýt) gol saldy. Al qonaqtar sapynan jalǵyz shaıbanyń avtory Denıs Alekseev (29-mınýt) atandy.
Bul «Barystyń» QHL-daǵy segizinshi jeńisi. «Shyǵys» dıvızıony boıynsha týrnır kestesinde «Barys» komandasy keıingi bir jeńilis jáne bir jeńisten soń besinshi orynǵa turaqtady. Komandanyń enshisinde 25 upaı bar.
Endi «Barys» klýby aldaǵy alty oıyndy syrt alańda ótkizedi. 30 qyrkúıekte «Traktormen» (Chelıabınsk), 2 qazanda «Neftehımıkpen» (Nıjnekamsk), 4 qazanda «Dınamomen» (Mınsk), 6 qazanda «Sochımen» (Sochı), 10 qazanda «Avangardpen» (Omsk) jáne 12 qazan kúni «Iýgramen» (Hanty-Mansıısk) kúsh synasady.
Álı BITО́RE, «Egemen Qazaqstan»