Astanada kóshe-jol jelisine júktemeni tómendetý jáne qoǵamdyq kóliktiń áleýetin arttyrý boıynsha jobalar ári qaraı jalǵasyn tabady, dep xabarlady Astana ákimdiginiń baspasóz qyzmeti.
Jańa avtobýs jolaqtary aldaǵy ýaqytta Sh. Ýálıxanov jáne S. Seıfýllın kóshelerinde paıda bolady, dedi juma kúni "2016-2020 jyldarǵa arnalǵan Astana qalasyn damytý jóninde" baǵdarlamany iske asyrý barysynda elordanyń kólik keshenin jańǵyrtýǵa arnalǵan "Nur Otan" qalalyq partııasynyń tyńdalymynda "Astana qalasy jolaýshylar kóligi basqarmasy" MM basshysy Bekmyrza Igenberdınov.
"Qazirgi ýaqytta iske asyrylýy eń qysqa merzimge josparlanǵan 12 joba belgilendi. Olardyń biri ári - «BusLane» jobasyn jalǵastyrý. "Birinshi kezekte Ýálıxanov jáne Seıfýllın kósheleri boıynsha jobalardyń iske asyrylýyn qarastyrýdy usynamyz. Aıta keteıik, ár kóshe boıynsha 25 avtobýs júredi. Atalmysh ýchaskede qoǵamdyq kóliktiń jolaýshylar aǵyny táýligine shamamen 140 myń jolaýshyny quraıdy,- dedi Bekmyrza Igenberdınov.
Onyń sózine qaraǵanda, búginde qalada 350 myńnan astam kólik quraly resmı túrde tirkelgen. О́z kezeginde qala ishinde jáne qala syrtyna júretin kólikterdi esepke alǵanda- 400-450 myń kólik quraly.
Elorda turǵyndary jyl saıyn ortasha eseppen 5%-ǵa ósedi, al kólikterdiń sany 9%-ǵa artady, bul óz aldyna qalanyń kólik jelisi úshin problema bolyp tabylady.
Qazirgi ýaqytta Astanada 1 405 avtobýs paıdalanýǵa berilgen, 1 119 aıaldama kesheni qyzmet kórsetedi. 370-ten astam baǵdarsham nysany, 2 860 beınebaqylaý kamerasy jumys isteıdi, 21 myńǵa jýyq jol belgileri ornatylǵan.
Kólikterdiń kóptigine, joǵary deńgeıine baılanysty, jol keptelisterine oraı Astana ákimligimen 5 baǵytqa bólingen kólik keshenin damytý boıynsha baǵdarlama iske asyrylýda. Bul qoǵamdyq kóliktiń, basqarý júıesiniń damýy, tyıymdar men shekteýler, jol ınfraqurylymynyń damýy. Ár baǵyt jobalardyń tizbesin quraıdy.
Qazirgi ýaqytta Astanada 23 kóshe boıynsha qoǵamdyq kóliktiń 76 shaqyrym belgilengen jolaǵy iske qosylǵan.