Ottan da ystyq Otanymyzdyń óshpes shyraǵyn jarqyrata jaǵa bildik. Myń ólip, myń tirilgen atamuramyzdy áspettep, keler urpaq mıras tutar ulttyq qundylyqtarymyzdy aıshyqtadyq.
Endi mine, «Rýhanı jańǵyrý» baǵdarlamasy arqyly adamzattyq alyp kósh-kerýenniń aldynan kórinýge den qoıdyq.
Alla qalasa, ana tilimizdi latyn qarpine kóshiremiz. Qorqaqtaıtyn eshnárse joq, ótken ǵasyrdyń sonaý otyzynshy jyldary latyn qarpimen saýatyn ashqan meniń apam keńestik ásker qatarynda júrgenimde latyn qarpimen hat jazatyn. Mektepte nemis tilin oqyǵandyqtan mazmunyn kóp qınalmaı-aq túsinetinmin. Bara-bara ózim de apama latyn qarpimen sálem hat joldaýǵa kóshtim.
Apam aıtyp otyrýshy edi, jaz maýsymynda aýylǵa Úshtóbeden Qyzyl otaýdyń eki muǵalimi kelip, búkil turǵyndarǵa kıiz úıdiń ishinde til syndyrtyp ketti dep. Anam osylaısha ǵumyr boıy latyn qarpimen jazyp, syzyp júrdi. Qazirgi kezeń men ol zamannyń arasy jer men kókteı emes pe? Internet arqyly jer-jahanmen jarasyp otyrǵan bizder ótken ǵasyrdaǵy ata-analarymyzdan qalys qala qoımaspyz. Shyǵarmalarymyz oqylmaı qalady degen beker sóz. Aǵylshyn, ıa orys tilindegi murty buzylmaı jatqan kitaptar qanshama?! Qundy dúnıe qaı tilde jazylmasyn elenbeı qalmaıdy. Biz úshin jáne bir tıimdiligi, memlekettik tilimizdi úırene almaı júrgen qaısybir otandastarymyz kóztanys latyn tiline negizdelgen qazaq tilin jeńil meńgeredi. Eń bastysy, latyn qarpine kóshý arqyly tek túrkitildesterge ǵana emes, álemniń seksen paıyzǵa jýyq elderine ınternet jelisi arqyly jaqyndaı túsemiz. Sondyqtan da Jetisý ólkesiniń jurtshylyǵy bul dáýirlik bastamany kýana tolaıym kuptap otyr. Biz keleshegi kemel halyqpyz!
Ámire ÁRIN, Almaty oblystyq «Jetisý» gazetiniń bas redaktory