Búgin Dýshanbede Qazaqstanda shyǵarylǵan avtomobılderdiń 55 dana alǵashqy partııasyn «Holdıng Azııa grýpp Tadjıkıstan» JAQ taksomotor parkine tapsyrýǵa arnalǵan saltanatty is-shara ótti. Bul jaıynda Qazaqstannyń Tájikstandaǵy Elshiliginen málim etti, dep habarlaıdy QazAqparat.
Sharaǵa Qazaqstannyń Tájikstandaǵy Elshisi Nurlan Seıtimov, Tájikstan Respýblıkasynyń Kólik mınıstri Hýdoıor Hýdoıorzoda, Dýshanbe qalasy tóraǵasynyń orynbasary Kýrbon Tagaı Saıdzoda, sondaı-aq isker, qoǵamdyq ortalar men BAQ ókilderi qatysty.
N.Seıtimov Qazaqstan men Tájikstannyń arasyndaǵy ózara saýdanyń joǵary deńgeıin atap ótti. Bul oraıda, Qazaqstan sońǵy jyldary Tájikstannyń negizgi syrtqy saýda seriktesteriniń úshtigine kiredi. 2017 jyly qańtar-tamyzda Qazaqstan men Tájikstan arasyndaǵy taýar aınalymynyń kólemi 525,1 mln AQSh dollaryn qurap, ol 2016 jyldyń sáıkes kezeńimen salystyrǵanda 29,7 paıyzǵa joǵary boldy.
Sonymen qatar Elshi eki eldiń sharýashylyq sýbektileri arasynda Tájikstanǵa qazaqstandyq taýarlardy jetkizilimi kezindegi kooperasııalyq baılanystardy arttyrýdaǵy «KazakhExport» ESK» AQ-nyń mańyzdy róline nazar aýdardy. «KazakhExport» quraldary men múmkindikterin tanystyryp, Elshilik tarapynan osy kompanııa men tájikstandyq ımporterler arasyndaǵy baılanystardy damytýǵa qajetti járdem kórsetýge daıyndyǵyn bildirdi.
Esterińizge sala ketsek, bıylǵy jyldyń sáýir aıynda «KazakhExport» Eksporttyq saqtandyrý kompanııasy» AQ qoldaýymen qazaqstandyq avtoóndirýshiler («SaryarqaAvtoProm» jáne «Hyundai Trans Auto») men «Azııa grýpp Tadjıkıstan» holdıngi arasynda 2000 avtomobıl (1000 «Peugeot 2012» markisi jáne 1000 «JAC S3» markisi) jetkizýge jalpy quny 24 mln AQSh dollaryn quraıtyn kelisimshart jasalǵan bolatyn.