Birikken Ulttar Uıymy – halyqaralyq beıbitshilik pen qaýipsizdikti nyǵaıtý, elder arasyndaǵy yntymaqtastyqty arttyrý, klımattyń ózgerýi, turaqty damý, adam quqyǵy, qarýsyzdaný, lańkestik, gýmanıtarlyq jáne tótenshe jaǵdaılar, genderlik teńdik tárizdi ózge de mańyzdy máseleler boıynsha sheshimder qabyldaıtyn, keń aýqymdy ókilettikke ıe halyqaralyq uıym.
Degenmen HH ǵasyrdyń sońy men HHI ǵasyrdyń basyndaǵy álemdik derjavalar arasyndaǵy qarama-qaıshylyqtar, olardyń túrli aımaqtardaǵy yqpaldaryn arttyrýǵa degen saıasattary, halyqaralyq keńistikte jeke sheshimder qabyldap, uıymnyń qararlary men sheshimderine qulaq aspaýy BUU-nyń bedeli men yqpal etý tetikterine keri áserin tıgizgen bolatyn. Sońǵy 20 jylda keıbir memleketter túrli jeleýmen, BUU minberinde talqylamastan jáne onyń sheshiminsiz basqa elderdiń terrıtorııasyna basyp kirip, áskerı qımyldar jasap, memlekettik bılikti qulatýǵa deıin barýda.
Budan Uıymnyń yqpal etý múmkindikteri azaıyp, túrli elder aldyndaǵy bedeli tómendeýde. Bul jaǵdaıattar óz kezeginde Uıymnyń qyzmetin ýaqyt talabyna saı reformalaý qajettigin kórsetedi. Rasynda, Uıymnyń daǵdarysqa urynǵany sońǵy jyldarda anyq ańǵarylýda. Kópten beri onyń basqarý jáne qurylymdyq júıesinde ýaqyt talabyna saı ózgeristerdiń bolmaýynan, BUU óziniń saıası rólin álsiretkendeı. Ahýal osylaısha jalǵasa beretin bolsa, Uıymmen eseptesetinder sany da azaıa túsetini sózsiz. Osy oraıda BUU-ny reformalaýǵa qatysty tushymdy usynystar qajet boldy. Bul máselede Qazaqstan Prezıdenti Nursultan Nazarbaev BUU-nyń bıik minberinen óziniń ilgeri nıetinen týyndaǵan ilkimdi oılaryn bildirip, halyqaralyq qoǵamdastyqtyń rızashylyǵyna bólengenin aıyryqsha atap ótýimiz kerek.
EQYU, IYU, ShYU, AО́SShK sııaqty qyzmetteri qaýipsizdik pen turaqtylyqty saqtaýǵa baǵyttalǵan beldi halyqaralyq uıymdarǵa tabysty tóraǵalyq etip, olardyń qyzmetin jańa satyǵa kóterip, ǵalamdyq jáne aımaqtyq deńgeıdegi qaýipsizdikti qamtamasyz etý baǵytynda naqty usynystar men is-qımyldar jasap kele jatqan elimizdiń Prezıdenti BUU-nyń 70 jyldyq mereıtoıyna arnalǵan sammıtinde onyń qyzmetin saıası jáne ekonomıkalyq baǵyttarda jetildirýge qatysty tyń bastamalar kóterip, ony iske asyrý tetikterin jarııalaǵan bolatyn. Onda negizinen Uıymnyń lańkestik pen ekstremızmge qarsy kúresin kúsheıtip, memleketterdi zulymdyqqa qarsy biriktirý, onyń Ekonomıkalyq jáne áleýmettik keńesin Jahandyq damý keńesine aınaldyrý, Jahandyq strategııalyq bastama - 2045 josparyn ázirleý sekildi mańyzdy usynystar aıtylǵan-dy. Sondaı-aq, Elbasy BUU-nyń damýyna jańa qarqyn berý maqsatynda, jyl saıyn árbir memleket óz qorǵanys bıýdjetiniń 1 paıyzdyq mólsherin BUU-nyń Turaqty damý maqsattary úshin qurǵan arnaıy qoryna aýdaryp, onyń shtab-páterin Azııa aımaǵyna kóshirý sııaqty mańyzdy oılaryn da halyqaralyq qoǵamdastyqtyń nazaryna usynǵan edi. Budan bólek, BUU-nyń jumysyn jetildirý máseleleri elimizdiń BUU Qaýipsizdik Keńesiniń turaqty emes múshesi retindegi jeti negizgi basymdyqtarynyń birinde atap kórsetilgen.
Taıaýda BUU Bas Assambleıasynyń 72-sessııasynda BUU qyzmetin jetildirýge qatysty arnaıy is-shara ótip, onyń qyzmetin reformalaýǵa qatysty usynystar jasalyp, arnaıy deklarasııa qabyldandy. Deklarasııada Bas hatshynyń rólin kúsheıtý, BUU búkil júıesiniń esep berýin jáne ashyqtyǵyn arttyrý, uıymdy qarjylandyrýda elderdiń úlesin teńestirý, menedjment sapasyn kóterý, bıýdjettik josparlaýdy jetildirý, sııaqty t.b. máseleler qamtylǵan. Sonymen qatar, qujatta múshe memleketter men BUU Hatshylyǵy arasyndaǵy áriptestik qatynastar men senimdi nyǵaıtý mańyzdylyǵy aıtylǵan.
Jalpy, Deklarasııany qoldaǵan Uıymǵa múshe 128 memlekettiń qatarynda bizdiń elimiz de bar. BUU-ny reformalaý boıynsha qabyldanǵan bul qujatta kózdelgen máseleler Qazaqstannyń osy saladaǵy negizgi kózqarastaryna, Elbasynyń usynystaryna tolyq sáıkes keledi. Bul Deklarasııa Uıymdaǵy daǵdarystyq jaǵdaıdy toqtatýǵa, 72 jyl buryn San-Fransıskoda bastalǵan úrdisti jandandyra túsýge jol ashatyny sózsiz. Deklarasııa BUU-ǵa múshe 193 memlekettiń basshylarynyń bárine «saǵattaryn teńestirýge» jáne Uıymnyń bolashaqtaǵy mańyzdy basymdyqtaryn anyqtaýǵa biregeı múmkindikter bermek.
Qazaqstan BUU Qaýipsizdik Keńesine 2017-2018 jyldardaǵy turaqty emes múshesi retinde Uıym qyzmetin túrli baǵyttary boıynsha múmkindiginshe jetildirýge, memleketter arasyndaǵy qarama-qaıshylyqtar men teketiresterdi barynsha beıbit, dıplomatııalyq jolmen, táýelsizdik jyldary jınaqtalǵan bitimgerlik tájirıbesin barynsha qoldana otyryp sheshýge kúsh salatyn bolady.