Sh.Aımanov atyndaǵy «Qazaqfılm» kınostýdııasynda Mádenıet jáne sport mınıstrliginiń tapsyrysy boıynsha óndiriske jiberilgen «Balýan Sholaq» kórkem fılminiń túsirilim jumystary aıaqtaldy.
Fılmde jurtshylyqty óziniń qara kúshimen ǵana emes, kompozıtorlyǵymen de tánti etken Balýan Sholaq týraly baıandalady. Bul – rejısser Nurgeldi Sadyǵulovtyń kórkem fılmdegi tyrnaqaldy týyndysy. Kınossenarıı jazýshy, dramatýrg Dýlat Isabekovtyń M.Áýezov atyndaǵy qazaq memlekettik akademııalyq drama teatrynda sahnalanǵan «Jaýjúrek» pesasynyń jelisi boıynsha jazylǵan. Rejısser bizge fılmniń óndiriste júrip jatqan montajdaý kezeńi men túsirilim jumystary aıasynda atqarylǵan sharýa jaıyn baıandap berdi. Rejısser fılmniń túsirilim jumystaryna tyńǵylyqty daıyndyqpen kelgenin aıtady.
– Bul – Balýan Sholaq jaıly alǵash ret túsirilip otyrǵan tolyqmetrajdy fılm. Balýannyń urpaqtarymen sóılese otyryp, zertteý jumystaryn júrgizdik, – degen rejısser fılmniń ásirese jastar úshin tárbıelik, taǵylymdyq máni zor ekenin aıtady.
2016 jyly jeltoqsan aıynda bastalǵan túsirilim jumystary Almaty oblysy, Pavlodar qalasy jáne Býrabaıda ótken. Almaty oblysy Kegen jáne Jalańash aýyldarynda fılmniń negizgi bóligi túsirilgen. Kópshilik sahnalarǵa 500-ge jýyq adam qatysqan. Rejısserdiń aıtýy boıynsha fılmde kompıýterlik grafıka kóp jasalady.
«Osy kúzde túsiretin bir sahna qaldy, túsirilim jumystaryna tolyq 7 aı ýaqyt ketti. Qyzyljar jármeńkesin sahnalaý úshin kóptegen tarıhı derekterdi jınastyrdyq. Pavlodardaǵy ólketaný mýzeıinen tyń málimetter tabyldy. Mysaly, taýarlar kerýenmen ǵana emes, sý joldarymen de tasymaldanǵan eken», deıdi rejısser.
Rejısser Balýan Sholaq taqyrybyna bala kezden yntyq bolyp ósken. О́ıtkeni Nurgeldiniń ózi de kezinde kúreske belsene qatysqan.
«Shý aýdany, Tólebı aýylyndaǵy shaǵyn murajaıdyń aldynda Balýan Sholaq kótergen degen aýyr tas jatatyn. Ár jarysqa keter kezde atamyzdykindeı kúsh bolsyn dep jarysqa yrymdap attanatynbyz. Keıin «Jaýjúrek» spektaklin kórgennen keıin, Dýlat aǵamyzǵa usynys tastadym. Ol kisiniń qoldaýymen 2012 jyldan beri kıno túsirýge qamdana bastadyq», deıdi.
Fılmniń qoıýshy-sýretshisi Erjan Súleımenovtyń aıtýy boıynsha dekorasııalardy eki aıdyń ishinde turǵyzǵan. Keıipker beınesin ústemeleı otyryp qoǵam sıpatyn kórsetýge, shyǵarmaǵa ulttyq sıpat berýge bas nazar aýdarylǵan. Sýretshiler departamenti jármeńkeni arhıv materıaldary men sýretter negizinde jasap shyqqan. Bas keıipkerler – Balýan Sholaq, Ǵalııa, Balqadısha jáne Tatıananyń kıimderi kostıým jónindegi sýretshi Merýert Torybaevanyń eskızderi boıynsha tigilgen. Mysaly, balýannyń anasynyń obrazy úshin 30-dan astam kostıým eskızi jasalǵanyn aıtýǵa bolady.
Rejısserdiń sózinshe, fılmniń bas keıipkeri – Balýan Sholaqtyń róline akterdi kóp izdegen. Kastıngke kásibı akterlermen qatar sportshylar da qatysqan. Biriniń dene turqy sáıkes kelmese, endi biriniń obraz jasaýda sheberligi jetpegen. Qatań irikteýden soń Balýan Sholaqtyń róline akter Erkebulan Daıyrov bekitilgen. Balýannyń obrazyna sáıkes kelýi úshin akter kúresten dáris alyp, 15 kılogramm salmaq qosqan. Fılmge Erkebulan Daıyrovpen birge elimizdiń tanymal akteri Bolat Ábdilmanov pen jas aktrısa Janel Maqajan túsedi.
Fılm 2018 jyldyń kókteminde jalpy prokatqa shyǵady dep josparlanyp otyr.
Aıa О́MIRTAI,
«Egemen Qazaqstan»