Elbasy bir jıynda el aýzynda júrgen anekdotty aıtqan.
Mánisi mynaý. Aıǵa orys, qazaq jáne nemis kóship barady. Nemis bara sala úı salýǵa kirisip ketedi. Orys mujyǵy baý-baqsha ósiredi. Al, birge kelgen qazaq ushty-kúıli joq.
Kúz bolady. Orys baý-baqsha ónimderin, araq-sharabyn kóterip, nemistiń úıine keledi. Úı jaıly. Jyp-jyly uıadaı.
– Sende úı bar. Mende azyq-túlik bar. Birge turaıyq, – deıdi orys. Nemis kelisedi.
Ekeýi as ishe bergende esik ashylyp, qazaq kirip keledi.
– Serjant Pálensheev. Qonystaryń qutty bolsyn. Tanysyp qoıalyq. Men senderdiń «ýchaskovoılaryńmyn».
Memleket basshysy ázil retinde aıtqanymen, uly abyz Abaı minegen jalqaýlyqtan aryla almaı júrgenimiz ras. Bári birdeı bolmasa da úı, qora salyp, baý-baqsha ósirgende qońsy aǵaıyndardyń kómegine júginetindigimiz jáne ras.
Ońaı jerden paıda tapqysy kelgen jalǵan polıseı Shymkent qalasynda da paıda bolypty. Ústinde ıne-jipten jańa shyqqandaı polısııa ofıseriniń kıimi, qolynda qujaty bar, dúkenge kirip kelgen ol zań buzýshylyq faktilerin aıta bastaıdy. Záresi ketken dúken qojaıyny «aıyppulyn» qolma-qol tólep jiberedi. Dánikken polıseıdiń erkinsigeni sonsha aqsha, telefon alýdan bólek, tońazytqyshtardy ashyp qarap, qalaǵanyn ala bastaǵan.
Kúdik alǵan dúken ıeleriniń biri jalǵan polıseıdi áńgimege tartyp turyp, oblystyq IIB qyzmetkerlerine habar beredi.
Qylmys ústinde ustalǵan ol qaladaǵy Abaı aýdandyq polısııa beketinde qamaýda otyr.
Búginde sotqa deıingi tergeý amaldary júrgizilýde.
Bireýdiń múlkin bopsalaý arqyly paıda taýyp kelgen jalǵan polıseı endi shyn polıseılerge jaýap berip jatyr.
Baqtııar TAIJAN,
«Egemen Qazaqstan»
Ońtústik Qazaqstan oblysy