Statıstıka komıtetiniń derekterine súıensek 1 maýsymdaǵy jaǵdaı boıynsha Astana qalasynyń aýmaǵynda 1 002,8 myń adam turady. Halyq qajettiligin azyq-túlik ónimderin tutynýdyń mınımaldy normalaryna sáıkes qanaǵattandyrý úshin 617,2 myń tonnaǵa jýyq negizgi azyq-túlik taýarlary qajet eken. Al bul rette Astananyń azyq-túlik beldeýin damytýdyń jol kartasy mańyzdy ról artqarady. Búgin Úkimet otyrysynda osy karta bekitildi.
Elordanyń azyq-túlik beldeýin jetildirýdiń jol kartasy Memleket basshysynyń 2017 jylǵy sáýirde bergen tapsyrmalaryna sáıkes ázirlendi. Bul týraly Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda aýyl sharýashylyǵy birinshi vıse-mınıstri Qaırat Aıtýǵanov málimdedi.
Aıtýǵanovtyń aıtýynsha, qalanyń jeke óndirisi Astana halqynyń unǵa, makaron ónimderine, nan men jarmaǵa degen qajettiligin jabady. Elorda turǵyndaryn otandyq azyq-túlik taýarlarymen qamtamasyz etý maqsatynda azyq-túlik beldeýi aımaǵynda qajetti óndiristi qurý, respýblıkanyń ózge óńirlerinen ónimderdi turaqty túrde jetkizip turýǵa jaǵdaı jasaý jáne astananyń saýda ınfraqurylymyn damytý boıynsha mindetter qoıyldy.
Úsh aımaqqa bólý arqyly Qaraǵandy oblysynyń jaqyn ornalasqan tórt aýdanynyń jáne Aqmola oblysynyń barlyq aýdandary óndirisiniń áleýetine taldaý júrgizildi. Birinshi aımaq 100 shaqyrym radıýsta, ekinshisi — 200 jáne úshinshisi — 300 shaqyrym.
Eki oblystyń ákimdikterine arnalǵan jol kartasynda ártaraptandyrýdy esepke alǵanda 2018 jylǵa arnalǵan egis alqaptarynyń qajetti qurylymy anyqtalǵan. 300 shaqyrym radıýstaǵy aýdandardyń qoı eti óndirisiniń kólemin qajettiliktiń 60%-na deıin ulǵaıtý áleýeti bar. Al shujyq ónimderin, óńdelgen sút, sary maı, irimshik jáne súzbe kólemin qajettiliktiń 50%-na deıin ulǵaıtý áleýeti bar. Et óńdeý boıynsha jalpy qýattylyǵy 28 myń tonna jáne júktemesi 72% bolatyn 24 kásiporyn qyzmet kórsetedi. Jylyna 90 myń tonna sút óndirý qýattylyǵyn eskergende, azyq-túlik beldeýiniń 20 sút zaýyty boıynsha júkteme 55%-dy quraıdy. Sondaı-aq, munda óndiris kólemin ulǵaıtý boıynsha naqty ındıkatorlar qoıylǵan.
Birinshi vıse-mınıstrdiń aıtýynsha, óńdeý kásiporyndaryna shıkizat berýdi yntalandyrý úshin usaq jáne ortasha sharýashylyqtardy aýyl sharýashylyǵy kooperatıvterine biriktirý jumystary jalǵastyrylyp jatyr. Qazaqstannyń ózge óńirlerinen jetispeıtin azyq-túlik túrlerin jetkizýdi qosa alǵanda, Astanaǵa azyq-túlik jetkizý jumystaryn yntalandyrý úshin zańnamalyq deńgeıde «Astana qalasynyń azyq-túlik beldeýine qatysýshy» statýsy bekitiledi. Ol aýyl sharýashylyǵy óndirýshilerine belgili-bir jeńildikter alýǵa múmkindik beredi.
Saýda ınfraqurylymyn keńeıtý boıynsha úshinshi mindetti iske asyrý úshin Astana qalasynda jyl sońyna deıin 50 modýldik saýda pavılony iske qosylady. Osy maqsattarǵa oraı, elorda ákimdigi jer telimderin bólip, «Kóshe saýdasyn damytý» baǵdarlamasy aıasynda 90 mln teńge kóleminde ınvestısııalar tartty.
«Jalpy, Jol kartasyn iske asyrý Astana qalasynyń halqyn «baǵa-sapa» tepe-teń qatynasy boıynsha qajetti azyq-túlik kólemimen qamtamasyz etedi», dedi Q.Aıtýǵanov.
Dınara BITIK, "Egemen Qazaqstan"