Astana prosesi aıasyndaǵy Sırııa jóninde joǵary deńgeıdegi jetinshi halyqaralyq kezdesý urys qımyldaryn toqtatý rejimine kepilger elderdiń ózara kelisýimen 2017 jyly 30-31 qazanda ótedi.
Kelissózder barysynda tutqyndardy, qamaýda otyrǵandardy bosatý, qaza tapqandardyń denelerin berý jáne iz-túzsiz joǵalǵandardy izdestirý boıynsha jumys tobynyń erejesin bekitý josparlanýda. Sondaı-aq taraptar halyqaralyq terrorızmmen kúres máselelerin qarastyrýǵa jáne Sırııada mınadan tazartý jumystaryn júrgizý týraly birlesken málimdemeni qabyldaýǵa nıetti. Bulardan bólek ózekti dep tabylǵan basqa da máseleler talqylanýy yqtımal.
Aıta keteıik, Astanada qyrkúıekte ótken kelissózderdiń altynshy raýndy taraptardyń Sırııada deeskalasııa aımaqtaryn qurý týraly memorandým erejelerin iske asyrý jáne Astana prosesi aıasynda osyǵan deıin qabyldanǵan basqa da sheshimderdiń oryndalýy boıynsha jumysty jalǵastyrý nıeti rastalǵan birlesken málimdemeni qabyldaýmen aıaqtalǵan-dy. Sırııada qurylǵan deeskalasııa aımaqtary atalǵan qaqtyǵystyń kólemin edáýir tómendetip Sırııadaǵy gýmanıtarlyq jaǵdaıdy jaqsartýǵa múmkindik berdi.
«Egemen-aqparat»