Shyńǵyrlaýda ustazǵa eskertkish ornatyldy

Muǵalimder kúni qarsańynda ashyl­ǵan bul eskertkishtiń ıdeıasy aýdandaǵy bilim salasy ardagerlerinen shyǵypty. Bastamany barsha jurt qoldap, aýdandaǵy bilim salasy qyzmet­kerleri birkúndik eńbekaqysyn aýdarǵan. Týyndyny aýdan­daǵy talaı eskertkishti somdap shyqqan sheber Zákirjan Islambekov jasaǵan.

Eskertkishtiń ashylý saltanaty Shyńǵyrlaý aýdanynyń 89 jyldyq toıymen tuspa tus keldi. Saltanatty sharaǵa qushaq-qushaq gúl ustaǵan ustazdar kóp jınaldy. Tarydaı tir­shilik ıesin taýdaı tulǵaǵa aınaldyratyn ulaǵatty ustazǵa arnalǵan mundaı eskertkish búkil Oral óńirinde joq edi. Árbir adam balasy bas ıer aıaýly jan – muǵalimniń Shyńǵyrlaýdaǵy músini jıyntyq obraz túrinde beınelengen. Oqýshy jetkinshekti jetelep, oń qolymen ıyǵynan demep turǵan muǵalıma alys qıyrǵa kóz tastaǵan. Sol qolynda – synyp jýrnaly. Al búldirshinniń qolynda – bir shoq gúl. 

– Elbasy Nursultan Nazarbaev eldik damý, ulttyq biregeı­ligimiz turǵysyndaǵy «Týǵan jer» baǵdarlamasynda árbir qazaq­stan­dyqtyń óz eline, jerine degen pat­rıottyq sezimin arttyryp, týǵan aýylynyń damýyna óz úlesin qosýǵa shaqyrǵan bolatyn. Mine, búgin jer­gilikti azamattardyń kúshimen ustaz­dardyń qurmetine arnalǵan eskert­kish boı kóterdi. Biz bul kompozısııa­ny «Ǵasyr ǵalamaty – ustaz» dep atadyq. Bul búkil adamzat balasyn adaldyqqa, adamgershilikke, uly dostyqqa, beıbit­shilik pen birlikke tárbıelep, bilýge, ilim álemine shaqyrǵan ustazdardyń uly eńbegine, uly tulǵasyna qoıylǵan eskert­kish bolmaq. Mundaı eskert­kishti biz respýblıka boıyn­sha alǵash­qylardyń biri bolyp ornatyp otyrmyz, – dedi Shyńǵyrlaý aýdanynyń ákimi Albert Esalıev.

Ustazǵa arnalǵan eskertkishti Y.Al­tynsarın atyndaǵy tósbelgi, Qazaqstan Respýblıkasynyń Bilim jáne ǵylym mınıs­trliginiń «Qurmet gramotasy», aýdan ákiminiń «Úzdik muǵalim» nomı­nasııasynyń ıegeri Elmıra Sapasheva, Shyńǵyrlaý orta mektebiniń 11-synyp oqýshysy, «Altyn belgi» úmitkeri Dınara Akbaleeva, L.Qylyshev atyndaǵy Shıli orta mektebiniń 10-synyp oqýshysy, «Úzdik attestat» ıegeri Dıas Saǵynǵalıev ashty. Mektep oqý­shylary ustazdyq pen ulylyq tur­ǵysynda taqpaqtaryn arnap, jas ónerpazdar dombyradan kúı tókti.

Bıylǵy oqý jylynda Shyńǵyrlaý aýdanynda jalpy bilim beretin 16 mektep jumys isteıdi. Onda 1972 oqý­shy bilim alyp jatyr. 2016-2017 oqý jylynyń qorytyndysy boıynsha aýdan­da 6 túlek «Altyn belgi», 1 oqý­shy «Úz­dik attestat» ıegeri atanǵan bola­tyn. 

Qazbek QUTTYMURATULY, «Egemen Qazaqstan» Batys Qazaqstan oblysy