Memleket basshysynyń tapsyrmasymen QR Premer-Mınıstri Baqytjan Saǵyntaev jumys saparymen Almatyǵa bardy, dep habarlaıdy primeminister.kz.
Úkimet basshysy memlekettik baǵdarlamalar men Elbasynyń «Qazaqstannyń úshinshi jańǵyrýy: jahandyq básekege qabilettilik» Joldaýy mindetteriniń iske asyrylýymen, sondaı-aq, qarjy sektoryn damytý, ShOB-qa qoldaý kórsetý, óndiristik ınnovasııalardy engizý jáne qalanyń kólik júıesin jaqsartý sharalarymen tanysady.
Almatyǵa kelgen boıda, keshke, 23 qazanda Premer-Mınıstr birinshi kezekte qala áýejaıyn keshendi jańǵyrtý josparymen tanysty. Aıta ketý kerek, áýe aılaǵy Ońtústik-Shyǵys Azııa men Eýropa arasyndaǵy geografııalyq qolaıly jerde ornalasqan, ol óńirdiń tranzıttik áleýetin arttyrýǵa jol ashady.
Búginde Almaty áýejaıynan shamamen 40 áýe kompanııasy táýligine 150-den astam reıs jasaıdy. Joba aıasynda tranzıttik aımaqtardy jáne jolaýshylar termınalynyń ushý zaldaryn keńeıtý josparda bar. Bul jolaýshylar men júk tasymaldarynyń kólemin ulǵaıtýǵa múmkindik beredi.
Budan keıin QR Premer-Mınıstri ekinshi deńgeıli bankterdiń basshylarymen jáne elimizdiń qarjy sektorynyń iri qatysýshylarymen kezdesý ótkizdi.
Qatysýshylar keńes barysynda birqatar asa ózekti taqyryptardy talqylady, solardyń ishinde Qazaqstan Respýblıkasynda elektrondy saýdany damytýdyń 2018-2020 jyldarǵa arnalǵan Jol kartasynyń jobasyn, Zeınetaqy qorynyń jáne Mindetti medısınalyq saqtandyrý qorynyń aktıvterin basqarý máselelerin, sondaı-aq, jeke tulǵalardy sıfrlyq sáıkestendirý, qor naryǵy jáne sıfrlandyrý jaǵdaıynda saqtandyrý naryǵyn damytý máselelerin talqylady.