Ortalyq kommýnıkasııalar qyzmetinde «KazAvtoProm» Qazaqstan avtokólik salasyndaǵy kásiporyndar odaǵynyń baspasóz konferensııasy ótti. Salanyń 2017 jylǵy 9 aıy kezeńindegi jumys qorytyndylary týraly basqarma tóraǵasy Oleg Alfıorov aqparat berdi.
«Qazaqstan aýmaǵynda jalpy quny 101,4 mlrd teńgege jeńil, júk tasıtyn, avtobýs tehnıkasyn, arnaýly mashınalar men tirkemelerdi qosa alǵanda 13 312 birlik avtokólik quraldary jasap shyǵarylǵan bolatyn. Zattaı maǵynada shyǵarý kólemi ótken jylǵy kórsetkishten 3 esege asyp tústi. Jeńil avtomobılderdi jasap shyǵarý 11 575 birlik mánine jetip, 3,9 esege ósti. Avtobýs tehnıkasyn (448 birlik) shyǵarý 2017 jyldyń úsh toqsanynyń qorytyndylary boıynsha eski jyldyń kórsetkishinen 4,5 esege artty. Mamandandyrylǵan tehnıkany (151 birlik) jasap shyǵarý 2,3 esege ósti. Júk tasıtyn avtomobılderdi shyǵarý 20,4%-ǵa qysqardy. 2017 jyldyń qyrkúıek aıynyń nátıjeleri boıynsha Qazaqstan kásiporyndarynyń konveıerlerinen 1 501 birlik avtokólik quraldary shyqty. Ol 2016 jyldyń tıisti aıynyń nátıjelerinen eki ese joǵary.
Otandyq avtokólikterdi satý jyl basynan 13 129 birlikke jetti, bul ótken jylǵydan (8003 birlik) 64 paıyzǵa joǵary. Jergilikti qurastyrý avtomobılderiniń segmentinde basym bolatyn pozısııany «Azııa Avto» AQ ıelenedi – 8772 satylǵan avtomobılder nemese otandyq tehnıkanyń jalpy satylymynyń 67 paıyzy. «SaryarqaAvtoProm» JShS-ne 3003 birlik júk tıelgen bolatyn (segmenttegi úlesi – 23 paıyz). Odan ári otandyq avtoóndirýshilerdiń ónimin satý reıtınginde «KAMAZ-Injınırıng» AQ (430 birlik 3 paıyz), «Hyundai Trans Auto» JShS (319 birlik, 2 paıyz), «SemAZ» JShS (226 birlik, 2 paıyz), «AgromashHoldıng» AQ (224 birlik, 2 paıyz) jáne «Daewoo Bus Kazakhstan» JShS (155 birlik,1 paıyz) ornalasqan», dedi O.Alfıorov.
Sonymen qatar ol jeńil kólikterdiń eń izdenip alatyn brendteriniń bestigi qaısy ekenin de tilge tıek etti. Spıkerdiń sózinshe qazaqstandyq qurastyrýdaǵy jeńil avtomobılderdiń eń suranysqa ıe brendteriniń bestigin qańtar-qyrkúıek aılarynyń korytyndysy boıynsha Lada avtokóligi bastap tur. Odan keıingi oryndarda Hyundai, KIA, Chevrolet jáne JAC tur. Otandyq kásiporyndar usynatyn markalar tizimine sondaı-aq Ravon, SsangYong , Skoda, Peugeot jáne Geely kirdi. Jergilikti jasap shyǵarylǵan jeńil avtomobılderdi satý reıtıngisin Lada brendisiniń úlgileri bastady.
Basqarma tóraǵasy 1 047 avtomobılder qańtar-qyrkúıek kezeńinde memlekettik baǵdarlamanyń qatysýshylarymen jeńildikti avtonesıelerge satyp alynǵanyn jetkizdi.
«Eski avtomobılderdi satyp alý boıynsha baǵdarlama sheńberinde qazaqstandyqtar aǵymdaǵy jyldyń 9 aıy ishinde 25 167 birlik tehnıkany paıdaǵa asyrdy. PShKQ paıdaǵa asyrý baǵdarlamasynyń ekinshi kezeńi bastalýynan úsh aı ótkende jańa kólik quraldaryn satyp alýǵa 1 961 jeńildikti sertıfıkat berilgen. Eldiń avtosalondarynda barlyǵy 531 sertıfıkat paıdalanylǵan, oǵan qazaqstandyqtar elimizde jasap shyǵarylǵan 313 avtomobılderdi satyp aldy», dedi ol.
Raýan QAIDAR, «Egemen Qazaqstan»