Sınoptıkter Astanada aldaǵy birneshe saǵattyń ishinde jańbyrdyń arty qarǵa ulasatynyn boljap otyr, dep habarlaıdy «Qazgıdromet» RMK.
Aldaǵy 3 táýlikke berilgen aýa raıy boljamyna sáıkes, Astanada taıaý saǵattardyń ishinde jańbyrdyń sońy qarǵa ulasady. Eske salaıyq, ótken demalys kúnderi birneshe óńirde aýa raıynyń kúrt ózgerýine baılanysty eskertý jarııalanǵan bolatyn. Qazaqstan aýmaǵyna qar alyp kelýi múmkin sıklondar kelýde. Qazirdiń ózinde respýblıkanyń batysynda ornalasqan sıklon batys jáne soltústik aımaqtarda qar men jańbyr túrindegi jaýyn-shashyn týyndatýda.
Sonymen qatar «Qazgıdromettiń» boljamyna qaraǵanda, ylǵaldy qar men kóktaıǵaq aldaǵy úsh táýlik boıy saqtalady.
«Aldaǵy úsh táýlikte jańbyrdyń arty jıi qarǵa ulasyp otyrady. Sıklonnyń jáne onymen baılanysty sýyq atmosfera aǵynynyń jyljýynan respýblıkanyń soltústik-shyǵysynda, soltústik, ortalyq, keıinnen shyǵys oblystarynda qar molynan jaýýy múmkin. Batystan soqqan jeldiń ekpini 23-28m/s-ke jetedi, keıbir jerlerde burqasyn, kóktaıǵaq bolady», - dep málimdedi «Qazgıdromet» RMK.