Batyrlar eli atanyp, halqymyzdyń nebir áıgili uldary men qyzdary dúnıege kelgen qoınaýy qut Qobda aýdanynda jyl saıyn jaǵymdy ózgerister bolyp jatady. Taıaýda ǵana aýdanda syńǵyrlaǵan sý jańa 320 oryndyq jańa mektep-gımnazııa ǵımaraty salynyp, paıdalanýǵa berildi.
Qobda – halqymyzdyń demografııalyq ósimine de óz úlesin qosyp, besikteri terbetilýden tolastamaı kele jatqan órkendi óńir. Munda ómirge kelgen nárestelerdiń sany oblystaǵy ózge óńirlermen salystyra qaraǵanda birshama joǵary. Bul jaǵymdy jaıt aýdan ortalyǵyndaǵy mektep úıiniń tarlyǵyn kórsetti. Sondyqtan oqýshylar úsh aýysymdyq oqý tártibine kóshken bolatyn.
Endi mine, osy bir ýaqytsha qolaısyzdyq artta qalyp, tekti topyraqtyń ul-qyzdary zamanaýı záýlim ǵımaratta oqýlaryn jalǵastyrdy. Jańa ǵımaratta oqýshylardyń sapaly bilim alýyna barlyq jaǵdaılar jasalǵan, sońǵy úlgidegi aqparattyq tehnologııa jetistikterimen jaraqtandyrylǵan.
Atap aıtqanda, úsh qabatty eńseli nysanda sport jáne májilis zaldary, kitaphana, ashana jáne jańa modıfıkasııaǵa negizdelgen oqý kabınetteri bar. Medıateka deısiz be, qysqy baq deısiz be, osynyń bári qobdalyq jetkinshekterdiń jan-jaqty úılesimdi damýyna qyzmet jasamaq. Gımnazııa mártebesin ıelengen aıryqsha sáýlet jobasynyń jalpy quny 760 mıllıon teńgeni quraıdy.
Temir QUSAIYN, «Egemen Qazaqstan»
Aqtóbe oblysy