Belgili jýrnalıst Oń­dasyn Elýbaı Zaısan aýdanynda shyǵarmashylyq kezdesý ótkizdi

Bir emes, birneshe Olım­pıa­daǵa, álem chempıonattaryna bar­ǵan jıhankez jýrnalıst eń áýeli ózi týyp-ósken Sarjyra aýy­lyn­daǵy mektepte eldi meken jurtshylyǵymen, bilim ordasy­nyń ustazdarymen jáne oqýshy­larmen kezdesip, emen-jarqyn áńgime-dúken qurdy.

«Qaıda júr­sem de Sar­jy­ramdy ańsap tura­myn. Ba­la kezimizde myna irgedegi Mó­jik ózenine baryp sýǵa túse­tinbiz», dep balalyq bal sha­ǵyn saǵyna eske alyp, mektep kitaphanasyna óziniń jáne basqa da aqyn-jazýshylardyń 50 kitabyn syıǵa tartty. Bir jyl­dary aýyl mektebine jabylý qaýpi tóngende áriptesimiz bilim ordasyn aman saqtap qalýǵa úles qosqan eken. Sodan da bolar perzenttik paryzyna adal qalamgerdi aýyldastary qushaq jaıa qarsy alyp, jyly lebizderin bildirip, syı-qurmet kórsetti. Al alaqandaı ǵana aýyl Sarjyranyń oqýshylary kezdesýdi úsh tilde júrgizip, shalǵaıda bolsa da órkenıet kóshinen qalmaı kele jatqandyqtaryn ańǵartqandaı boldy.

Týǵan aýylynan keıin jýr­nalıst Zaısan qalasyndaǵy M.Dáýlenov atyndaǵy orta mektepte aýdan jurtshylyǵymen júzdesip, shyǵarmashylyǵynyń este qalarlyq sátterinen syr shertti. Sıdneı Olımpıadasynda jeldeı júıtkigen jeńil atlet Olga Shıshıgınanyń jeńisine elimizden barǵan delegasııa ishi­nen jalǵyz ózi kýá bolyp, eń alǵash bolyp quttyqtaǵanyn te­bi­­rene eske alyp, ýnıversıtette orkestr quramynda júrgende Es­kendir Hasanǵalıev pen Nur­­ǵalı Núsipjanovtan dáris tyń­daǵanyn áńgimelep, qolyna dombyrasyn alyp, kúmbirletip kúı tartyp berdi. Jýrna­lıspen О́skemennen birge kelgen qol kúresinen álemniń úsh dúrkin, Azııanyń 10 dúrkin chempıony, elimizdegi qol kúresi men gir sportynyń negizin qalaýshy Muqan Aǵzamov kezdesýde onyń sport salasyna sińirgen eńbeginiń zor, munyń jas urpaqqa berer úlgi-ónegesi mol ekendigin tilge tıek etti.

Jyly ráýishte órbigen júz­de­sý­de sóz alǵan aýdan áki­mi Te­mir­bek Qasymjanov taǵylym­dy sha­ranyń Elbasynyń «Rýhanı jań­ǵyrý» baǵdarlamasy aıasynda ótkizilip otyrǵanyn aıtyp, jyl boıy Zaısannan shyqqan el­ge tanymal tulǵalardyń qa­ty­­­sýy­men birqatar kezdesý uıym­­dastyrylǵanyn jet­kizdi. Kez­­desý barysynda O.Elý­baı­dyń bıyl Almatyda ótken qysqy Ýnı­versıada jaıynda syr shertetin «Alataýdy dú­bir­letken 11 kún» atty kita­bynyń tusaýkeseri ótti.

Azamat QASYM,

«Egemen Qazaqstan»

 Shyǵys Qazaqstan oblysy,

 Zaısan aýdany